(Blick) – Skandali që ndodhi para tri vjetësh vazhdon të ketë jehonë. 1.5 milardë shikues televizivë panë në vitin 2022 kuzhinierin e famshëm turk, Salt Bae (42), që ndërhyri në festimin e fitores së Argjentinës në Kupën e Botës në futboll. Dhe tani për skandalin do të diskutohet në Gjykatën e Punës në Zurich.
Argjentina sapo kishte mposhtur Francën në finale, kur kuzhinieri turk hyri me forcë në fushë. Ai e “detyroi” superyllin Lionel Messi për një “selfie”, rrëmbeu trofeun dhe e puthi atë. Madje bëri sikur hodhi kripë mbi trofe, një veprim që e ka bërë të famshëm.
FIFA, si organizatore e Botërorit, reagoi me zemërim. Dhe pyetja ishte se kush e lejoi Salt Baen të hynte në fushë.
Fajtori u identifikua shpejt: Ersan Gokay, një shtetas i Gjermanisë që jeton në Zvicër.
Salt Bae ishte pjesë e finales së Botërorit si i ftuar VIP. Kishte ftesë nga presidenti i FIFA-s, Gianni Infantino. Atëbotë ata ishin miq. Pas fishkëllimës së fundit Gokay e shoqëroi Salt Baen në tunelin e lojtarëve. Kur e humbi për pak kohë nga vëmendja, kuzhinieri i famshëm kaloi pa leje rojet e sigurisë dhe u bashkua me argjentinasit që festonin.
Në Zvicër, Gokay u ftua në një takim me zyrtarët e FIFA-s. Ata e paralajmëruan, ia ulën bonusin e Kupës së Botës dhe ia kufizuan udhëtimet ndërkombëtare. Në fund, Federata Ndërkombëtare e Futbollit anuloi udhëtimin e Gokayt në Kupën e Botës 2023 për futbolliste në Australi, edhe pse si ekspert financiar ai ishte planifikuar të ishte atje.
“Kjo vjen nga larg”, i thanë atij.
Gokay filloi të vuajë nga depresioni, të rrinte zgjuar për netë të tëra dhe u tërhoq nga jeta shoqërore. Mori ilaçe kundër depresionit dhe për gjumë. Mjekët i caktuan pushim mjekësor.
Ai angazhoi një avokat për të negociuar një marrëveshje pushimi me FIFA-n. Por FIFA dyshoi në paaftësinë e tij për të punuar dhe e pushoi nga puna.
“Sjellja juaj ndaj mbikëqyrësit të drejtpërdrejtë ka qenë problem i përsëritur. Pavarësisht përpjekjeve, kjo për fat të keq nuk është përmirësuar”, shkruan në letrën e pushimit.
Gokay e mohon këtë. Incidenti me Salt Bae përmendet vetëm pak nga drejtuesit e FIFA-s në letrën e pushimit nga puna.
Në një email lamtumirës për rreth 100 punonjës në FIFA, Gokay paraqet versionin e tij të ngjarjes. Dy ditë më pas ai shkarkohet me efekt të menjëhershëm.
Gokay pranon se gaboi, por vlerëson se FIFA e sakrifikoi atë.
“Isha besnik. Jetoja për FIFA-n ditë e natë. Në fund u sakrifikova për të mbrojtur të tjerët”, thotë ai.
Tani ai po ndërmerr veprime ligjore. Në fund të tetorit ngriti padi në Gjykatën e Punës në Zurich, duke pretenduar shkarkim të padrejtë, pa paralajmërim. Procedurat kanë nisur. Disa avokatë kanë refuzuar të ndërmarrin veprime kundër FIFA-s së fuqishme. Një përpjekje për ndërmjetësim dështoi sepse FIFA e quajti vazhdimisht punonjës të pabesë.
