Para 40 vjetësh u zhvendos në Matiqan të Prishtinës nga fshati Lluga i Istogut. Është ky i moshuari Ramë Zeka, i cili pemëtarinë e kishte veprimtari kryesore në fshatin e lindjes e të njëjtën po e ushtron edhe në periferi të kryeqytetit.
“E kam përfunduar shkollën e bujqësisë. Kjo është edhe arsyeja pse jam shpërngul nga fshati Lluga i Istogut për këtu në Matiqan në Prishtinë. Nuk isha larguar nga fshati im asnjëherë nëse nuk do të ishte për studimet e mia. E pastaj e kam menduar edhe të ardhmen e fëmijëve të mi e nuk jam kthyer më. Kështu zgjodha që të merrem me pemëtari ashtu siç jam marrë në Lluga”, ka thënë ai për emisionin “SOT” në KTV.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoI pensionuari Zeka pemëtarinë e konsideron si punë nga e cila edhe siguron të ardhura. Ai ka thënë se për plot katër muaj të vitit të kaluar ka shitur kilogramë dardhash të llojeve të ndryshme.
“Unë zgjohem në ora 6 të mëngjesit, sidomos nëse pemët që po i shihni në oborr e kanë kohën e spërkatjes. Shpesh herë këtë proces e kryej edhe në mbrëmje. I kam 5 lloje dardhash, të cilat kërkojnë kujdes që gjatë sezonit të kem vjelje të kënaqshme. Viti i kaluar ka qenë i jashtëzakonshëm. 4 muaj kam shit pemë e kam arritur që të shes me kilogramë dardha e molla”, ka thënë ai.
Përveç pemëve që i ka në oborrin e tij, një numër të konsiderueshëm trupa pemësh i ka edhe në Lluga të Istogut.
Çdo fundjavë shkon në fshatin e tij, atje ku thotë se e gjen qetësinë duke u kujdesur për pemët e duke e punuar tokën.
Aty ku nuk ka pjesë gjelbëruese e tokë për t’u punuar Ramë Zeka ka thënë se nuk do mund të jetonte.
Në Matiqan ka deklaruar se do të shtojë llojet e pemëve, teksa ka përmendur se klientët i ka të rregullt në blerjen e pemëve prej tij.
“Fatmirësisht prej kur merrem me pemëtari kam arritur që të kem blerësit e mi besnik, sepse ata e dinë se si i punoj dhe si kujdesem për këto pemë në oborrin tim, në mënyrë krejt natyrale. Shitjen e bëj këtu, sepse mosha nuk ma mundëson t'i kryej të gjitha procedurat vet e në fund të dal në tregjet e vendit për t'i shitur pemët”, ka thënë ai.
Ramë Zeka edhe pse u zhvendos në Prishtinë, fshatin e lindjes ka thënë se nuk do ta lë asnjëherë anash.
Këtë e drejton edhe si thirrje për banorët e fshatrave të Kosovës.