Sabrina Carpenter për albumin e ri: Nuk është për ata që ofendohen lehtë

Këngëtarja Sabrina Carpenter ka zbuluar detaje për albumin e saj të ri “Man’s Best Friend”, që do të publikohet më 29 gusht, duke paralajmëruar se projekti nuk është për ata që nuk e pëlqejnë natyrën provokuese të këngëve të saj, ka raportuar The Hollywood Reporter.

“Ky album nuk është për ata që kapen pas moralit dhe ofendohen shpejt”, ka thënë Carpenter në intervistë me Gayle King për CBS Morning.

Megjithatë, ajo ka shtuar se edhe skeptikët mund të gjejnë diçka që t’i argëtojë.

“Mendoj se edhe ata mund ta dëgjojnë një album të tillë vetëm, në qetësinë e tyre, dhe të gjejnë diçka që i bën të buzëqeshin apo qeshin me vete”, ka thënë tutje këngëtarja.

Kur King komentoi se këngët e reja janë po aq “seksuale” sa edhe “të fuqishme”, Carpenter u përgjigj se albumi i saj s’ka pse të jetë diçka më shumë se vetëm argëtim.

“Ndonjëherë njerëzit i dëgjojnë vargjet më të guximshme dhe thonë: ‘S’dua ta këndoj këtë para të tjerëve.’ Është diçka si tepër shumë informacion personal. Por pastaj e mendoj skenën e koncertit, me kaq shumë vajza të reja që bërtasin me gjithë fuqinë e tyre me shoqet, dhe kuptojmë të gjithë bashkë: ‘Ky është vetëm argëtim’. Dhe s’ka pse të jetë diçka më shumë”, ka thënë këngëtarja.

Albumi ka ngjallur reagime edhe për shkak të kopertinës.

Pamja fillestare tregonte Carpenter të gjunjëzuar, ndërsa një burrë i tërhiqte flokët, gjë që u kritikua si “degraduese për gratë”.

Carpenter e mbrojti zgjedhjen që ka bërë dhe madje e mori me humor, duke publikuar edhe versione të tjera të kopertinës.

Më 25 qershor ajo ka shpërndarë edhe një variant bardh e zi, ku shihet duke mbështetur kokën në supin e një burri me kostum, dhe e shoqëroi me mbishkrimin ironik: “Këtu është një kopertinë e re e aprovuar nga Zoti”.

Kjo nuk është hera e parë që këngëtarja përballet me kritika për mënyrën si e shfaq seksualitetin në muzikën e saj.

“Gjithmonë më duket qesharake kur njerëzit ankohen dhe thonë: ‘Gjithçka që bën është të këndosh për këtë temë.’ Po ju vetë i keni bërë këto këngë të famshme. Qartazi ju e adhuroni seksin, jeni të fiksuar pas tij. Është pjesë e shfaqjes sime. Ka kaq shumë momente të tjera, por ju postoni çdo natë vetëm ‘pozicionet Juno’ dhe komentoni mbi to. Unë s’mund ta kontrolloj këtë”, pati thënë ajo në një intervistë për Rolling Stone.

Albumi “Man’s Best Friend” shënon projektin e shtatë në karrierën e Carpenter dhe, sipas The Hollywood Reporter, pritet të jetë një nga më të diskutuarit e këtij viti në muzikën pop.