-
Përktheu:
Vita Abrashi-Kajtazi
- 18 shkurt 2026 23:45
- Shpërndaje në:
Për të festuar 20-vjetorin e albumit të saj legjendar “Back to Black”, bendi i këngëtares së ndjerë britanike, Amy Winehouse, po rikthehet në turne me 30 koncerte.
Bendi, i udhëhequr nga Dale Davis, drejtori muzikor dhe bassist i Winehouset, do të nisë turneun më 22 tetor në York.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Nuk mund ta besoj që janë bërë 20 vjet nga ‘Back to Black’. Kur e përgëzova Amyn për suksesin e këtij albumi të jashtëzakonshëm, ajo më tha pa arrogancë: ‘E dija çfarë po bëja’, dhe atë moment kuptova se ajo e dinte saktësisht çfarë kishte krijuar. Është ende një nder dhe kënaqësi të performoj këto këngë nga kjo kryevepër e përjetshme”, ka thënë Davis për The York Press.
Albumi i vitit 2006 i dha Winehouset famë botërore, duke fituar pesë çmime “Grammy” në vitin 2008.
Në këtë turne, bendi do të interpretojë albumin në tërësi, së bashku me këngë të tjera të njohura nga reportuari i saj.
Bendi ka përvojë të gjerë me turne në Britani, si dhe performanca në Evropë, Azi, Amerikën e Veriut dhe Jugore. Biletat për koncertin e York do të jenë në shitje nga 20 shkurti.
Winehouse ka vdekur më 23 korrik 2011, në moshën 27-vjeçare, nga helmimi aksidental me alkool, një ngjarje që është përshkruar si “aksidentale”.
Ajo u gjet në shtëpinë e saj në Camden, Londër e rrethuar nga tre shishe të zbrazëta vodke.
Winehouse kishte luftuar me varësinë, buliminë dhe presionin e mediave gjatë karrierës së saj.
Pas vdekjes, familja e saj ka themeluar Amy Winehouse Foundation për të mbështetur të rinjtë që përballen me probleme të drogës dhe alkoolit.
Jeta dhe karriera e saj janë dokumentuar më pas në filmin e vitit 2015 “Amy” dhe biografinë e vitit 2024 “Back to Black”, duke e bërë Winehousen një nga figurat më të përmendura të ‘27 Club’, grupit të famshëm të muzikantëve që vdesin në moshën 27 vjeç.