Ish-aktori padit P.Diddyn për sulm seksual

Një person që ishte aktor kur ishte fëmijë ka ngritur një padi të re kundër reperit dhe producentit Sean “Diddy” Combs, duke e akuzuar për sulm seksual gjatë një ngjarjeje në Hollywood Hills në vitin 2007, ka raportuar CNN.

Padia, e dorëzuar këtë javë në California, pretendon se Combs e kishte ftuar të miturin në një dhomë private me premtimin se do të diskutonin mundësi pune dhe role të ardhshme në industrinë e argëtimit.

Sipas dokumenteve gjyqësore, Combs i kishte ofruar të riut një pije alkoolike dhe më pas kishte kryer veprime të papërshtatshme seksuale ndaj tij. Paditësi, i cili ka ngritur padinë me pseudonimin “John YH Roe”, pretendon se në atë kohë ishte nën moshën 18-vjeçare.

Përfaqësuesi i Combs i ka mohuar kategorikisht akuzat.

“Z. Combs i mohon pa asnjë mëdyshje këto pretendime. Ankesa përshkruan ngjarje që thuhet se kanë ndodhur pothuajse 20 vjet më parë dhe bazohet vetëm në rrëfimin e paditësit. Jemi të bindur se faktet do të tregojnë se këto pretendime janë të pabaza”, ka thënë zëdhënësi i tij, Juda Engelmayer.

Padia përfshin edhe agjencinë e atëhershme e cila e kishte angazhuar aktorin në fjalë, e cila akuzohet se nuk ka ofruar mbrojtjen e duhur për një të mitur dhe nuk ka siguruar praninë e një të rrituri gjatë ngjarjes.

Kjo nuk është hera e parë që Combs përballet me akuza të tilla. Ai është objekt i dhjetëra padive civile nga persona që pretendojnë se janë abuzuar seksualisht gjatë viteve, disa prej tyre duke qenë të mitur në kohën e ngjarjeve të pretenduara.

Combs ka mohuar vazhdimisht të gjitha akuzat.

“Z. Combs nuk ka sulmuar apo trafikuar seksualisht kurrë askënd, burrë apo grua, të rritur apo të mitur”, kanë deklaruar më herët avokatët e tij.

Ndërkohë, Zyra e Prokurorit të Qarkut të Los Angelesit po shqyrton veçmas një tjetër rast të pretenduar të sulmit seksual ndaj Combs për të vendosur nëse ka bazë për ngritjen e akuzave penale.

Aktualisht, Combs ndodhet në burg dhe po apelon dënimin e tij federal në New York për dy akuza që lidhen me transportimin e personave për qëllime prostitucioni.