Hayley Atwell lavdëron Tom Cruisen: Nuk do të ndalet kurrë

Aktorja Hayley Atwell ka lavdëruar kolegun e saj, Tom Cruise, duke thënë se ai “nuk do të ngadalësojë kurrë” dhe se pasioni i tij për filmin nuk njeh kufi.

Aktori 62-vjeçar është duke promovuar filmin “Mission: Impossible – The Final Reckoning”, i cili është përshkruar si kapitulli i fundit i serisë së famshme. Por, sipas Atwell, Cruise nuk ka ndërmend të ndalet.

“Ka një ndjenjë emocionale që ky është fundi i diçkaje, një lloj mbylljeje e fortë emocionale. Por Tom Cruise nuk do të ngadalësojë kurrë. Ai nuk do të ndalet. Ky është ai, kështu është Tom”, ka thënë ajo për revistën People.

Edhe aktorja Angela Bassett, e cila gjithashtu luan në këtë film, ka thënë se Cruise gjithmonë befason.

“Me zotin Cruise, nuk mund ta llogarisësh kurrë asgjë si të përfunduar. Ai është gjithmonë i gatshëm për aventura mahnitëse dhe për t’i dhënë audiencës pikërisht atë që dëshiron. Nuk do të supozoja kurrë që ky është fundi”, u shpreh 66-vjeçarja.

Cruise vetë e ka bërë të qartë se nuk ka në plan të ndalojë së realizuari filma në një intervistë për The Hollywood Reporter. 

“Do të vazhdoj t’i bëj filmat edhe kur të jem 100 vjeç. Nuk do të ndalem kurrë. Nuk do të ndalem së bëri aksion, drama, komedi, jam i entuziazmuar”, ka thënë ai.

Që prej vitit 1996, Cruise ka qenë fytyra kryesore e serisë së filmave “Mission: Impossible”, dhe ai mbetet thellësisht i lidhur me këtë eksperiencë.

“Ka pasur kaq shumë nivele shpërblimi nga bashkëpunimet me regjisorët, me ekipet, me njerëzit, me kulturat ku kemi punuar. Çdo gjë që kam mësuar dhe vazhdoj të mësoj rreth tregimit të historive, jetës, udhëheqjes, karakterit dhe çdo aspekti të filmit. Ka qenë e jashtëzakonshme, vërtet e jashtëzakonshme. Ndihem me fat që mund të bëj filmat që bëj, dhe e dua këtë, thjesht më pëlqen të bëj filma”, ka thënë ai.

I njohur për skenat e tij të rrezikshme, Cruise ka zbuluar gjithashtu se ka zhvilluar “rituale para akrobacioneve” për të qëndruar gjallë gjatë xhirimeve të skenave aksion.

“Ka shumë rituale që më mbajnë gjallë para se të bëj ndonjë akrobaci, varet nga ajo që po bëj dhe sa shumë përgatitje më duhet të bëj. Mendoj shumë për gjithçka, dhe janë shumë komplekse dhe interesante”, ka thënë ndër të tjera ai.