Ben Affleck dhe Matt Damon paditen nga dy policë

Aktorët e njohur, Ben Affleck dhe Matt Damon po përballen me një padi për shpifje nga dy policë të Miami-Dade, të cilët pretendojnë se filmi i tyre i ri “The Rip” ka dëmtuar reputacionin e tyre personal dhe profesional.

Padia është ngritur nga oficerët Jason Smith dhe Jonathan Santana kundër kompanisë “Artists Equity”, ka raportuar Entertainment Weekly.

Sipas dokumenteve gjyqësore, edhe pse emrat e tyre nuk përmenden drejtpërdrejt në film, personazhet dhe ngjarjet janë aq të lidhura me rastin real ku ata kanë qenë të përfshirë, saqë publiku ka krijuar përshtypjen se bëhet fjalë për ta.

Oficerët pretendojnë se filmi dhe reklamat e tij “nënkuptojnë sjellje të pahijshme, gjykim të dobët dhe veprime joetike” në lidhje me një operacion të vërtetë policor.

Padia akuzon kompaninë “Falco Productions”, si dhe “Artists Equity”, për shpifje dhe shkaktim të qëllimshëm të stresit emocional.

Ndërkohë, platforma transmetuese “Netflix”, që publikoi filmin, nuk është përfshirë si e paditur dhe ka refuzuar të komentojë.

Filmi “The Rip” ndjek historinë e dy policëve, të luajtur nga Damon dhe Affleck, të cilët zbulojnë 20 milionë dollarë para të kartelit të drogës, duke ekspozuar korrupsion brenda policisë së Miami-Dade.

Sipas padisë, filmi është frymëzuar nga një rast real i vitit 2016, kur Smith dhe Santana sekuestruan më shumë se 21 milionë dollarë gjatë një operacioni antidrogë.

Avokatët e oficerëve thonë se përdorimi i detajeve specifike të operacionit të 29 qershorit 2016, vendndodhja në Miami-Dade dhe përfshirja e njësisë antidrogë krijojnë bindjen se personazhet në film bazohen pikërisht te dy policët.

Padia përmend edhe disa skena ku personazhet shkelin rregullat policore, përfshirë një moment ku personazhi i Affleckut vret një agjent të “Drug Enforcement Administration”.

Oficerët pretendojnë gjithashtu se, përveç faktit që në realitet ka ndodhur sekuestrimi i parave, pjesa tjetër e ngjarjeve të paraqitura në film “nuk kanë ndodhur kurrë”.

Sipas avokatëve të tyre, familjarë dhe kolegë kanë filluar të dyshojnë se ata kanë përdorur paratë e sekuestruara për të rritur pronat, për të blerë makina dhe mjete lundruese apo për të paguar shkollimin privat të fëmijëve të tyre.

Kjo, sipas padisë, ka bërë që publiku t’i lidhë ata dhe policinë e Miami-Dade me korrupsionin e paraqitur në film.

Dokumentet gjyqësore pretendojnë gjithashtu se avokatët e policëve kishin dërguar një letër kompanive të filmit në dhjetor 2025, duke kërkuar që publikimi i tij të ndalej për shkak të detajeve që ata i konsideronin shpifëse.

Por sipas padisë, kompanitë u përgjigjën pas publikimit të filmit në janar 2026 duke thënë se shqetësimet ishin “të pabazuara”, pasi personazhet nuk përmendnin emrat e policëve dhe nuk kishte pretendim të drejtpërdrejtë për sjellje të pahijshme nga ana e tyre.

Tani, Smith dhe Santana po kërkojnë tërheqje publike të pretendimeve, shtimin e një paralajmërimi të dukshëm në film, dëmshpërblim financiar, dëmshpërblim ndëshkues dhe mbulimin e shpenzimeve ligjore.