Celine Dion do të rikthehet në skenë pas katër vjetësh

Këngëtarja legjendare Celine Dion ka njoftuar rikthimin e saj në skenë, katër vjet pasi u diagnostikua me një sëmundje të rrallë që ndikoi në zërin dhe aftësinë e saj për të ecur.

Artistja, e njohur për hitet si “My Heart Will Go On” dhe “Because You Loved Me”, do të mbajë një seri prej 10 koncertesh në arenën Paris La Défense Arena gjatë muajve shtator dhe tetor, ka raportuar BBC.

Njoftimi u bë në ditëlindjen e saj të 58-të. Në një mesazh në Instagram, ajo e quajti rikthimin:
“dhurata më e bukur e jetës sime”.

“Jam gati për këtë. Po ndihem mirë, jam e fortë, jam e emocionuar, natyrisht… dhe pak nervoze”, ka thënë ajo.

Duke folur për gjendjen e saj shëndetësore, Dion ka thënë se po shkon shumë mirë.

“Po shkoj shumë mirë, po e menaxhoj shëndetin tim, po ndihem mirë. Kam filluar të këndoj përsëri, madje edhe të kërcej pak”, ka thënë ajo.

Ajo ka falënderur fansat për mbështetjen gjatë viteve të fundit.

“Gjatë këtyre viteve, çdo ditë kam ndjerë lutjet dhe mbështetjen tuaj, mirësinë dhe dashurinë tuaj. Ju jam shumë mirënjohëse. Mezi pres t’ju takoj sërish”, ka thënë ajo.

Dion nuk ka mbajtur koncert që nga 8 marsi 2020 në Newark, pasi turneu i saj u ndërpre fillimisht nga pandemia Covid-19 dhe më pas nga diagnostikimi i saj me sëmundjen Stiff Person Syndrome, që i shkakton ngurtësim të muskujve.

Për rikthimin e saj, koncertet janë planifikuar me disa ditë pushim mes tyre, për të shmangur lodhjen fizike. Biletat do të dalin në shitje më 7 prill dhe pritet një kërkesë jashtëzakonisht e madhe.

Shenjat e rikthimit u panë edhe në Eiffel Tower, e cila u ndriçua me mesazhin “Paris, je suis prête” (“Paris, jam gati”), ndërsa u luajtën disa nga këngët e saj më të njohura.

Dion ka zbuluar në muajin dhjetor 2022 se vuan nga kjo sëmundje e rrallë neurologjike, e cila prek rreth 8,000 njerëz në botë. Ajo shkakton spazma të muskujve dhe vështirësi në lëvizje, dhe aktualisht nuk ka kurë.

“Është sikur dikush po të mbyt. Është sikur dikush po të shtyp laringun apo fytin”, ka thënë ajo në një intervistë.

Megjithatë, ajo nuk hoqi dorë. Në një intervistë për Vogue, Dion ka treguar për përkushtimin e saj.

“E shoh në dy mënyra: ose stërvitem si një atlet dhe punoj shumë fort, ose dorëzohem dhe gjithçka mbaron. Kam zgjedhur të punoj me gjithë trupin dhe shpirtin tim, nga koka te këmbët, me një ekip mjekësor. Punoj me gishtat e këmbëve, gjunjët, pulpën, gishtat e duarve, me këndimin dhe zërin tim”, ka thënë ylli.

Këto përpjekje dhanë rezultat. Në vitin 2024, ajo bëri një rikthim emocional në skenë gjatë Paris Olympics 2024, duke interpretuar këngën klasike “Hymne à l’Amour”.