Qindra mijëra njerëz kanë mbushur të shtunën rrugët e Novi Sadit, ku po mbahet tubim përkujtimor masiv me rastin e njëvjetorit të shembjes së një pjese të stacionit të trenit, ku humbën jetën 16 persona.
Qytetarë nga e gjithë Serbia kanë ardhur në Novi Sad për të nderuar viktimat e kësaj tragjedie. Shumë prej tyre kishin mbërritur që mbrëmë në qytet – disa në këmbë, e disa me biçikleta. Më të vendosurit ishin qytetarët e Novi Pazarit, të cilët kishin ecur për 16 ditë rresht për të arritur në këtë ngjarje.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoTë pranishmit u mblodhën sot në orën 10:00 në 16 pika të ndryshme të qytetit, duke marshuar drejt stacionit të trenit, ku tubimi nisi në orën 11:52 – në të njëjtën kohë kur një vit më parë ndodhi shembja tragjike. Ky konsiderohet si tubimi përkujtimor më i madh në historinë e Serbisë.
Kjo ngjarje vitin e kaluar shkaktoi valë të madhe protestash në qytete të ndryshme të Serbisë kundër pushtetit, të cilin qytetarët e mbanin përgjegjës për tragjedinë. Gjatë protestave u raportua edhe për raste të shumta të dhunës policore, që nxitën edhe më shumë zemërimin publik.
VIDEO:
Nepregledna masa ljudi ispred Železničke stanice u Novom Sadu, gde će sa 16 minuta tišine biti odata pošta stradalima. #NoviSad pic.twitter.com/uHqv9A92xX
Në prag të tubimit të sotëm, një nga liderët e opozitës në Novi Sad, Misha Baçullov, u arrestua sërish mbrëmë me akuzën se kishte inskenuar helmimin e tij për ta akuzuar presidentin serb Aleksandar Vuçiqin, me qëllim që të nxiste protesta masive.
Ndërkohë, Gjykata e Lartë në Beograd ka konfirmuar përsëri aktakuzën ndaj tre personave për shembjen e kulmit në Stacionin Hekurudhor të Novi Sadit.
Sipas agjencisë Tanjug, dje gjykata shpalli aktgjykim të shkallës së parë, duke konfirmuar aktakuzën e Departamentit Special për Luftimin e Korrupsionit, pasi rasti ishte kthyer më parë për rishqyrtim në Gjykatën e Apelit.
Në aktakuzë janë përfshirë Slobodanka K., menaxhere e zhvillimit të investimeve në kompaninë “Infrastrukturë Hekurudhore e Serbisë”, Milutin S., kryetar i Komisionit për Inspektim Teknik, dhe Biljana K., anëtare e të njëjtit komision. Ata akuzohen për disa vepra penale me elemente korrupsioni, që sipas Prokurorisë çuan në shembjen e kulmit më 1 nëntor të vitit të kaluar, ku humbën jetën 16 persona dhe u lënduan rëndë dy të tjerë.
Prokuroria thotë se ekziston dyshim i bazuar se mosveprimet dhe neglizhenca e të pandehurve kanë lidhje të drejtpërdrejtë me tragjedinë. Sipas saj, po të kishin vepruar me kujdes dhe të kishin kryer kontroll të jashtëzakonshëm për verifikimin e kushteve gjatë periudhës së testimit, ata do të kishin mundur të vërenin shenjat e plasaritjeve të kulmit në ditët para shembjes.