-
Nga:
Faton Polisi
- 30 nëntor 2025 19:37
- Shpërndaje në:
Ngjitja në podium për të pranuar medalje nuk ishte diçka e re për karateistin Islam Selmani. Edhe para tri vjetësh kishte pranuar medalje të rëndësishme.
Por medalja të cilën e pranoi të dielën ishte me peshë shumë të madhe dhe nuk krahasohet me të mëhershmet.
Falë Islam Selmanit, të dielën u shkrua histori e karatesë së Kosovës. Kosova për herë të parë fitoi medalje të argjendtë në ngjarjen më të rëndësishme të karatesë.
Selmani 20-vjeçar, në debutim në Botëror doli i dyti në kategorinë deri 60 kilogramë. Botërori përfundoi të dielën në Kajro të Egjiptit.
Medaljen e fituar Selmani thotë se ia kushton Kosovës, trajnerit Isak Curri dhe familjes së tij. Curri është edhe selektor i Kosovës.
“Emocioni ka qenë i papëshkruar, jam i lumtur që ia sigurova Kosovës këtë medalje e po ashtu edhe trajnerit tim”, ka thënë Selmani për KOHËN.
Për karateistin e ri të Kosovës ishte e hera e parë që paraqitej në Botërorin e të rriturve. Në finale të kategorisë deri 60 kilogramë, Selmani u mposht nga karateisti turk, Eray Shamdan.
“Unë jam i lumtur jashtë mase me këtë sukses, pasi është kampionati im i parë botëror si senior”, është shprehur anëtari i klubit AS-Prishtina nga Bardhodhi.
Pas dy vjetësh, karateisti i ri synon të bëhet kampion i botës.
“Ky është motiv shtesë dhe pas dy vjetësh kësmet kampion bote”.
Selmani thotë se fitorja ndaj të parit në ranglistën botërore në kategorinë deri 60 kilogramë, Hiromu Hashimoto të Japonisë, e kishte motivuar shumë.
“Ajo fitore më ka motivuar shumë, pasi pash që do ta kem më të lehtë për të vazhduar”, ka theksuar Selmani.
Nënkampioni i ri botëror në Evropianin e mbajtur në maj doli i pesti. Tri vjet më parë, në Pragë të Çekisë, Selmani kishte fituar medaljen e artë në Evropianin për kadetë, juniorë dhe U21.
“Kam pasur besim, pasi në Evropian kam mposhtur grekun i cili është prej më të mirëve në botë. Kam thënë se kur arrita ta mposhtë atë, mundem edhe të tjerët”.
Selmani thotë se rruga për t’u bërë i dyti i botës nuk ka qenë e lehtë.
“Rrugëtimi ka qenë pak i vështirë, por vetëm më kanë motivuar sfidat më shumë për të vazhduar me punë dhe nuk do të ndalem me kaq. Synimi im është të bëhem kampion bote, jo të mbetem nënkampion”, ka thënë Islam Selmani.
Krenar me arritjen e Selmanit është edhe trajneri Isak Curri.
“Akoma jemi në ndikimin e emocioneve dhe nuk jemi ende të stabilizuar qartë dhe saktë, por e kemi përjetuar shumë me gëzim. E kam përjetuar me krenari dhe do të mbetet në jetën tim një sukses i veçantë dhe i pashlyer”, ka thënë Curri.
Ai beson shumë se Islam Selmani do të jetë kampioni i ardhshëm i botës në karate.
“Është krenari e dyfishtë kur arrihet një sukses i madh siç është Botërori. Me moshën që Islami ka, në Botërorin e tij të parë si senior, është arritje dhe krenari për mua si selektor e po ashtu si trajner i tij personal, të cilin e kam përgatitur me shumë sfida gjatë rrugës. Ky sukses na bën krenarë gjithë neve. Krenaria është madhe, pasi tani e tutje kemi një kampion të ardhshëm, një sportist që presim shumë dhe përmes tij do të arrijmë të bëjmë edhe kampionë të tjerë. Pra ky sukses duhet të shërbejë si motiv për të tjerët, siç ne jemi motivuar nga kampionët e xhudos”, ka thënë Curri.
Ai e ka përshkruar Selmanin si sportist me shumë vetëbesim.
“Është një tip i garuesit që nuk respekton askënd në tatami dhe beson në vete që mund ta mposht gjithkënd. Kemi ardhur me bindje se do të kemi suksese, ndoshta jo në finale por kemi pasur besim se të bronztën do ta kapim gjithsesi”, ka thënë trajneri Isak Curri.
Kosova në Botëror u paraqit edhe me karateistin Betim Maliqi dhe karateisten Vlera Qerimi.