Islam Selmani ka regjistruar fitore të madhe në Kampionatin Botëror të karatesë që po mbahet në Kajro të Egjiptit.
Karateisti Selmani të shtunën mbrëma fitoi 6:3 në çerekfinale ndaj numrit një të botës në kategorinë deri 60 kilogram, Hiromu Hashimoto të Japonisë.
Selmani e dominoi luftën dhe në fund iu gëzua avancimit në gjysmëfinale të Botërorit të Kajros.
Në gjysmëfinale, Selmani do të ballafaqohet me karateistin nga Uzbekistani, Mekhriddin Turakhonov.
Gjysmëfinalja pritet të zhvillohet sonte nga ora 19:30.
Selmani të enjten e kaloi me sukses grupin duke i fituar të tri luftërat që i pati.
Në luftën e parë eliminoi garuesin nga Venezuela, Jhoisber Chataing, me rezultat 3:3. Më i mirë se kundërshtari i tij ishte edhe në luftën e dytë. Ai eliminoi garuesin nga Turqia, Eray Sandan, me rezultat 3:1, kurse kalimin si i dyti i grupit e siguroi pasi mposhti garuesin nga Kirgistani, Bekzhan Kalykov.
Në Botërorin në Egjipt garuan edhe disa karateistë të tjerë të Kosovës.
Betim Maliqi i kategorisë deri 75 kilogramë të enjten dhe Vlera Qerimi që garoi të premten në kategorinë deri 68 kilogramë, u eliminuan pasi nuk i kaluan grupet.