ZRRE: Qytetarët e prekur nga devijimet e njehsorëve do të kompensohen

Kompensim të konsumatorëve ka premtuar ZRRE-ja, për të gjithë ata që janë prekur nga devijimet në njehsorë të energjisë. Por, ky institucion ka insistuar se KEDS-i dhe KESCO-ja nuk kanë mundësi përfitimi nga gabimet eventuale në matje

Zyra e Rregullatorit të Energjisë Elektrike ka bërë të ditur se do të kompensohen qytetarët e prekur nga pasaktësitë në regjistrimin e energjisë së shpenzuar në kohë reale, të evidentuara në njehsorë.
ZRRE-ja ka njoftuar në një deklaratë për media të martën se ka kërkuar zëvendësimin e njehsorëve aty ku janë paraqitur devijime në kohë.

“ZRRE-ja informon publikun se në rastet e paraqitura nga konsumatorët lidhur me devijimin e mundshëm të orëve tarifore në faturimin e energjisë elektrike, ka ndërmarrë të gjitha veprimet e saj konform legjislacionit në fuqi, duke kërkuar zëvendësimin e atyre njehsorëve elektrikë, si dhe marrjen e masave konkrete për korrigjimin financiar në përputhje me vlerësimet teknike”, thuhet në njoftimin e ZRRE-së.

Megjithëkëtë, ZRRE-ja ka insistuar se te njehsorët e verifikuar është konstatuar matje e saktë e energjisë dhe se KEDS-i dhe KESCO-ja nuk kanë mundësi përfitimi nga gabimet eventuale në matje.

“Gabimet eventuale, nëse ndodhin, mund të kenë efekt të përkohshëm deri në identifikimin dhe korrigjimin e tyre dhe çdo konsumator i prekur do të kompensohet plotësisht, në përputhje me dispozitat ligjore dhe rregullative në fuqi. Moszbatimi i këtyre detyrimeve nga operatorët do të trajtohet sipas kornizës përkatëse ligjore”, thuhet në njoftim.

Ministria e Industrisë, Ndërmarrësisë, Tregtisë dhe Inovacionit (MINTI) ka shqiptuar javën e shkuar gjobë prej 30 mijë eurosh ndaj KEDS-it, pasi ka konstatuar gjashtë njehsorë elektrikë me afat të skaduar.

Në seancën e jashtëzakonshme gjatë së martës në Kuvend është diskutuar për energjinë elektrike, gjatë të cilit debat, ligjvënës të opozitës akuzuan partinë në pushtet për dallavere në këtë sektor.

Çmimi i energjisë elektrike në Kosovë ndryshon varësisht nga koha e shpenzimit.

Tarifa e lartë shfrytëzohet gjatë ditës dhe tarifa e ulët gjatë natës. Kjo e fundit, gjatë dimrit aplikohet në periudhën 22:00–07:00, ndërsa gjatë verës nga ora 23:00–08:00.

Sipas tarifave aktuale, konsumatorët familjarë që shpenzojnë deri në 800 kilovatë në orë (kWh) paguajnë 9.05 centë për kilovat, ndërsa 15.43 euro nëse e tejkalojnë këtë prag.

Gjatë tarifës së ulët, konsumatorët e paguajnë 3.88 euro kilovatin, ndërsa 7.28 euro nëse e tejkalojnë shifrën prej 800 kilovatësh.

KEDS-i i ka mohuar shkeljet, duke thënë se mospërputhjet janë çështje teknike dhe jo manipulim.
Sipas KEDS-it, nëse kalimi në tarifë është bërë me disa minuta vonesë, atëherë edhe ka përfunduar më vonë.