Vriten dy vëllezër në Malishevë, në arrati dhëndri që dyshohet se shtiu në ta

Në Golluboc të Malishevës dy vëllezër u vranë nga dhëndri para dyerve të shtëpisë. I dyshuari iku pasi shtiu në ta. Ndaj dorasit ka aktakuzë aktive për dhunë në familje, të kryer në mars. Ai ndodhet në arrati dhe Policia nuk i ra në gjurmë, me gjithë kontrollet që bënë në fshat

Dy vëllezër, njëri 32 e tjetri 45 vjeç, u vranë të enjten në Golluboc të Malishevës nga dhëndri i tyre.

Dorasi me inicialet A. I. ka ikur, por në vendngjarje ka lënë armën me të cilën dyshohet se kreu vrasjen e dyfishtë.

Të afërm të viktimave treguan se i dyshuari ka ardhur ta marrë bashkëshorten, motrën e dy viktimave, e cila po qëndronte te familja pasi disa ditë më parë i vdiq babai.

Në të dalë nga shtëpia, jashtë dyerve të oborrit ka nisur konflikti mes dhëndrit dhe vëllezërve, ndaj të cilëve shtiu me armë dhe i la të vdekur.

Doktori i Urgjencës në Malishevë, Festim Sylejmani, që shkoi në Kijevë për ekzaminim, tha se të dy viktimat u qëlluan në pjesën e kraharorit me nga dy plumba.

“Pacientin e kam parë dhe e kam ekzaminuar, por s’ka pasur shenja jete hiç. Bebëzat i ka pasur të zgjeruara komplet dhe parametrat vitalë i ka pasur zero. Ka pasur dy plumba në gjoks, i kemi edhe raportin dhe fotografitë”, ka treguar Sylejmani. “Pacienti tjetër në Kijevë, pasi ata i kam gjetur aty dhe kam shkuar si mjek i urgjencës prej Malishevës në Kijevë, ka pasur po ashtu dy plagë. Njërën e ka pasur në gjoks dhe tjetrën në anën e djathtë. Kur kam mbërritur, të dy kanë qenë pa shenja jete”.

Në vendin e ngjarjes mbetën dy vetura. Ajo me targa të Shkupit i përket dorasit.

Policia bashkë me Prokurorinë mblodhën provat në vendin e krimit.

E, për ta kapur dorasin, përveç kontrolleve në pikat e hyrje-daljeve të fshatit, kërkim u bë edhe në pyll.

Kryeprokurori i Prokurorisë Themelore në Gjakovë, Enis Gashi, doli në vendin e ngjarjes. Ai nuk u përgjigj nëse i dyshuari u arratis në këmbë.

Gashi tha se organet e rendit dhe hetuesisë janë duke punuar që sa më shpejt ta kapin.

“Kryerësi i kësaj vepre penale është ende në arrati dhe policia bashkë me prokurorinë është duke ndërmarrë të gjitha masat që sa më shpejt të identifikohet dhe të sigurohet prezenca e tij”, ka thënë kryeprokurori Gashi.

Ndaj të dyshuarit Prokuroria Themelore e Gjakovës inicioi rastin për dy vepra penale.

“Prokurori i Shtetit ka iniciuar rast për shkak të veprave penale “Vrasje e rëndë” dhe “Mbajtje nën pronësi, kontroll ose posedim i paautorizuar i armëve”, sipas Kodit Penal të Republikës së Kosovës (KPRK)”, thuhet në njoftimin e Prokurorisë Themelore në Gjakovë.

I dyshuari nuk ishte i panjohur për Prokurorinë. Ndaj tij një aktakuzë është aktive, të ngritur nga Prokuroria Themelore në Prishtinë edhe për dy vepra të tjera, dhunë në familje dhe kanosje.

Dorasi është nga një fshat i Drenasit.