Shfuqizohet aktgjykimi i Supremes për Koordinatorin Kombëtar të Krimit Ekonomik

I është dhënë e drejtë Këshillit Prokurorial që kohëzgjatja e mandatit të Koordinatorit Kombëtar për Luftimin e Krimit Ekonomik ta përcaktojë vetëm në tre vjet. Me vendimin e Gjykatës Kushtetuese, të publikuar të martën, rikthehet në fuqi rregullorja e re për Koordinatorin, pasi vjet Supremja e kishte shfuqizuar. Rasti ishte iniciuar nga Këshilli Prokurorial i Kosovës, i cili ka kërkuar vlerësimin e kushtetutshmërisë së aktgjykimit të Gjykatës Supreme i marrë më 14 korrik 2025.

Gjykata Kushtetuese e ka shpallur të pavlefshëm aktgjykimin e Gjykatës Supreme me anë të së cilit pati anuluar Rregulloren e Këshillit Prokurorial lidhur me mandatin e Koordinatorit Kombëtar për Luftimin e Krimit Ekonomik.

Rastin në Kushtetuese e ka dërguar KPK-ja, pasi më herët Supremja i kishte dhënë të drejtë prokurorit Shqipdon Fazliu, në padinë e tij ndaj KPK-së.

Pra, në vitin 2013 themelohet Institucioni i Koordinatorit Kombëtar për Luftimin e Krimit Ekonomik (IKKLKE), në atë kohë u hartua edhe rregullorja, e në bazë të saj, në krye të këtij institucioni u vendos prokurori Fazliu.

Në prill 2025, KPK-ja ndryshoi rregulloren dhe mandatin e Koordinatorit e caktoi të jetë tre vjet, me mundësi vazhdimi edhe një mandat.

Por, prokurori Fazliu paditi KPK-në në Supreme dhe fitoi rastin.

E në aktgjykimin e Kushtetueses, theksohet se Këshilli Prokurorial ka pasur të drejtë të ndryshojë rregulloren.

“Është e qartë që Rregullorja [nr.04/2025] (I) është miratuar nga një organi i autorizuar, në këtë rast KPK (II) ka pasur bazën ligjore; (III) përmbajtja e aktit nënligjor është brenda kufijve të përcaktuar me ligj; dhe (IV) nuk ka krijuar rregulla të reja ligjore të karakterit të përgjithshëm që do të konkurronin me rregullat e përcaktuara me ligj”, thuhet në aktgjykimin e Kushtetueses.

Një nga kushtet për t'u bërë Koordinator për Luftimin e Krimit Ekonomik ishte që personi të jetë prokuror me mandat të përhershëm, por sipas Kushtetueses, kjo nuk nënkupton që mandati si Koordinator është i përhershëm, ashtu siç ka pretenduar pala.

“Rrjedhimisht, deri në nxjerrjen e Rregullores [nr.04/2025], (I) kohëzgjatja e mandatit të Koordinatorit Kombëtar nuk ka qenë e përcaktuar me rregullore; dhe (II) as nuk ka qenë e përcaktuar që personi i përzgjedhur ka mandat të përhershëm si Koordinator Kombëtar. I njëjti ka raportuar në KPK dhe për aq kohë sa ka qenë i caktuar në këtë pozitë, ka qenë përgjegjës ndaj KPK-së. Normalisht, mandati i tij i përhershëm ishte si prokuror dhe lidhur me të cilën pozitë ai gëzon mbrojtjen juridike, që ia përcakton Kushtetuta dhe legjislacioni në fuqi”, thuhet në aktgjykim.

Në përfundim, Kushtetuesja konstatoi se Gjykata Supreme kishte bërë interpretim dhe zbatim të gabuar të ligjit, duke mos përmbushur standardet e një gjykimi të drejtë.

Për këtë arsye, ajo konstatoi shkelje të së drejtës për proces të rregullt gjyqësor dhe cenim të pavarësisë së Këshillit Prokurorial të Kosovës.