-
Nga:
Marigona Brahimi
- 17 qershor 2022 22:13
- Shpërndaje në:
Partia Demokratike e Kosovës e ka quajtur politik vendimin e Gjykatës Supreme për kthimin e faturimit të energjisë elektrike me tarifat e reja, pas pezullimit të tyre nga dy shkallë të gjykatave, Themelorja dhe Apeli. Sipas PDK-së, vendimi i Supremes është në dëm të interesit publik. Kjo parti ka paralajmëruar se atë do ta dërgojnë për interpretim në Gjykatën Kushtetuese.
Vendimin e së enjtes të Gjykatës Supreme, që anulon vendimet e Themelores dhe të Apelit për pezullim të shtrenjtimit të energjisë, Partia Demokratike e Kosovës e ka quajtur të ndikuar politikisht.
Në një konferencë për media, zëdhënësi i partisë, Faton Abdullahu, përveçqë vlerësoi se vendimi është në dëm të qytetarëve, hodhi edhe akuza në drejtim të gjykatësve të Supremes.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Ne e kundërshtojmë ashpër këtë vendim të Gjykatës Supreme, duke e konsideruar atë si vendim të ndikuar politikisht nga Qeveria aktuale. Gjykata Supreme duket se ka qenë e prirë nga interesa të tjera klanore, karrieriste dhe posaçërisht politike”, ka thënë Abdullahu.
Vendimin e ZRRE-së për shtrenjtim të energjisë, PDK-ja e pati dërguar në Gjykatën Themelore, e cila e kishte pezulluar përkohësisht.
Më pas ZRRE-ja kishte bërë ankesë ndaj vendimit të shkallës së parë në Gjykatë të Apelit, porse kjo e fundit e kishte vërtetuar si të bazuar vendimin e Themelores.
Rasti ka shkuar në Supreme, e cila të enjten i prishi vendimet e shkallës së parë dhe të dytë.
Por edhe për këtë vendim të Supremes, interpretim do të kërkohet në një instancë më të lartë.
“Tashmë, i autorizuar nga PDK-ja, unë kam filluar procesin e shqyrtimit të këtij vendimi dhe të njëjtin do ta dërgoj në Gjykatën Kushtetuese brenda dy javëve të ardhshme”, është shprehur përfaqësuesi ligjor i PDK-së, Faton Fetahu.
Në shkurt të këtij viti, ZRRE-ja ka marrë vendim që të nisë faturimin e energjisë me tarifa më të larta për konsumatorët, që shpenzojnë mbi 800 kilovatë.
Në një njoftim të lëshuar të premten, Rregullatori tha se tarifat e reja po garantojnë qëndrueshmëri në sistemin energjetik.