Lirohet “me kushte” ish-komandanti i UÇK-së, Isni Kilaj

Ani se është liruar, Kilaj ende është i dyshuar në proceset e Dhomave të Specializuara dhe lirimi i tij është objekt i kushteve të rrepta të vendosura nga Dhomat e Specializuara në Hagë. Në mesin e tyre, si kusht paraprak për lirimin e tij është caktuar shuma prej 30 mijë eurosh, të cilën ai duhet t’ia japë administratores si garanci financiare

Ish-komandanti i UÇK-së dhe ish-kryetari i Komunës së Malishevës, Isni Kilaj, është liruar të mërkurën nën kushte të rrepta nga Dhomat e Specializuara të Kosovës. 

Ani se është liruar, Kilaj ende është i dyshuar në proceset e Dhomave të Specializuara dhe lirimi i tij është objekt i kushteve të rrepta të vendosura nga Gjykatësi i Vetëm. Në mesin e tyre, si kusht paraprak për lirimin e tij është caktuar shuma prej 30 mijë eurosh, të cilën ai duhet t’ia japë administratores si garanci financiare.

“Nuk duhet të largohet nga territori i Kosovës, përveçse me leje të një paneli kompetent të DHSK-së dhe t’ia dorëzojë administratores pasaportën dhe çfarëdo dokumenti tjetër udhëtimi të tij; duhet të japë adresën në të cilën do të banojë gjatë kohëzgjatjes së procesit gjyqësor dhe të paraqitet çdo javë në Policinë e Kosovës, në përputhje me procedurat e përcaktuara nga administratorja; nuk duhet të bëjë, drejtpërdrejt ose tërthorazi, deklarata publike në media dhe/ose mediat sociale lidhur me DHSK-në, ZPS-në dhe ose proceset e DHSK-së, përfshirë deklarata që përmbajnë kërcënime, dhunë ose frikësim të dëshmitarëve dhe pengim të hetimit penal”, thuhet në komunikatën për media të DHMSK-së. Aty theksohet po ashtu se Kilaj duhet të marrë pjesë në çdo seancë gjyqësore të kërkuar nga DHSK-ja dhe të përmbushë çdo vendim apo urdhër tjetër të Gjykatës. “Gjykatësi i Vetëm theksoi se në rast të mospërmbushjes së ndonjë prej kushteve, do të lëshohet menjëherë urdhër për arrestimin e z. Kilaj”, thuhet në komunikatë.

Në komunikatë është bërë e ditur edhe procedura që e ka shoqëruar këtë proces deri te vendimi. 
“Z. Isni Kilaj u lirua në Kosovë sot, më 15 maj, me kushte të rrepta, në bazë të vendimit të Gjykatësit të Vetëm të Dhomave të Specializuara të Kosovës (DHSK) të datës 3 maj 2024. Në vijim ky vendim u konfirmua edhe nga një panel i Gjykatës së Apelit i DHSK-së më 13 maj 2024. Në Vendimin mbi Rishikimin e Paraburgimit të Isni Kilajt, Gjykatësi i Vetëm konstatoi se ende ekziston dyshimi i bazuar se z. Kilaj ka kryer, vetë ose së bashku me të tjerë, vepra penale kundër administrimit të drejtësisë. Gjykatësi i Vetëm konstatoi gjithashtu se vazhdon të ekzistojë rrezik i moderuar që z. Kilaj të arratiset dhe mund të pengojë ecurinë e procedurave penale dhe të kryejë vepra penale të tjera”, thuhet në komunikatë. “Ai konstatoi më tej se asnjë prej kushteve të paraqitura nga Mbrojtja e z.Kilaj dhe asnjë nga kushtet e tjera të vendosura nga Gjykatësi i Vetëm nuk mund të kufizojnë plotësisht aftësinë e z. Kilaj për të penguar ecurinë e procedurave të DHSK-së dhe për të kryer vepra penale të tjera. Megjithatë, Gjykatësi i Vetëm arriti në përfundimin se zgjatja e paraburgimit të z. Kilaj në rrethanat aktuale do të ishte e paarsyeshme, duke marrë në konsideratë prezumimin e pafajësisë dhe të drejtën e tij për liri në rrethanat e zhvillimeve të reja”. 

Bëhet e ditur se Kilaj lidhur me veprat penale për të cilat konsiderohet i dyshuar mund të dënohet me burgim prej 1 deri në 5 vjet dhe se kërkesa e kohëve të fundit që Zyra e Prokurorit të Specializuar (ZPS) i paraqiti Gjykatësit të Vetëm për pezullimin e shqyrtimit të aktakuzës së dorëzuar prej saj, për shkak se synon të paraqesë një aktakuzë të ndryshuar, e vonon në mënyrë të konsiderueshme kalendarin e procesit. 

“Për këtë arsye, Gjykatësi i Vetëm vendosi që rreziqet që do të rezultonin prej lirimit të z. Kilaj nuk peshojnë më shumë se e drejta e tij themelore për liri. Më 13 maj, paneli i Gjykatës së Apelit rrëzoi apelin e ZPS-së kundër vendimit. Apeli i ZPS-së fokusohej në kushtet e lirimit të z. Kilaj të urdhëruara nga Gjykatësi i Vetëm. Ndonëse është liruar, z. Kilaj vazhdon të jetë i dyshuar në proceset e DHSK-së dhe lirimi i tij është objekt i kushteve të rrepta të vendosura nga Gjykatësi i Vetëm”, bëhet e ditur në njoftim. 

Gjykatësi i Vetëm ka theksuar se në rast të mospërmbushjes së ndonjë prej kushteve, do të lëshohet menjëherë urdhër për arrestimin e Kilajt.

Isni Kilaj ishte arrestuar në nëntorin e vitit të kaluar nën dyshimin se ka kryer veprën penale “pengim i personave zyrtarë në kryerjen e detyrave zyrtare” dhe “shkelje e sekretit të procedurave”. Siç thuhet në komunikatën për media të Dhomave të Specializuara, Gjykatësi i Vetëm arriti në përfundimin se zgjatja e paraburgimit të Kilajt në rrethanat aktuale do të ishte e paarsyeshme dhe se rreziqet që do të rezultonin prej lirimit të tij nuk peshojnë më shumë se e drejta e tij themelore për liri.