Kurti: Nga një gjigant i fjetur “Trepçën” do ta kthejmë në një pasuri minerare

Në shënim të 34-vjetorit të grevës së minatorëve të “Trepçës”, kryeministri Albin Kurti ka premtuar që këtë gjigant, siç e ka quajtur ai të fjetur, do ta kthejnë në një pasuri minerare. Nga ekzekutivi është premtuar investim në modernizim të teknologjisë. Nga Sindikata u kërkua plotësimi i kërkesave të tyre, siç janë kontrata kolektive dhe mosha e pensionimit.

Kryeministri Albin Kurti ka premtuar që gjigantin e dikurshëm ekonomik “Trepça” do ta kthejnë në një pasuri minerare.

Në manifestimin tradicional “Java e Minatorëve” që kujton grevën historike të minatorëve të mbajtur 34 vjet më parë, Kurti tha se minatorët janë në qendër të kësaj historie, të tashmes dhe të ardhmes së përbashkët.

“Sfida e të gjithëve për ‘Trepçën’ dhe posaçërisht e Qeverisë, është që nga një gjigant i cili konsiderohet i fjetur, ‘Trepça’ të kthehet në një burim pasurish minerare që nga nëntoka ngrit nivelet e të gjitha stadeve të punës të kësaj ndërmarrjeje përtej çdo kujtese a historie për këtë parajsë nëntokësore”, ka theksuar Kurti.

Investime në modernizim të teknologjisë ka premtuar ministrja e Ekonomisë, Artane Rizvanolli.

“Ne gëzohemi dhe jemi krenarë me arritjet e ‘Trepçës’ gjatë këtyre dy vjetëve të fundit dhe zotohemi se do të vazhdojmë të përkrahim ‘Trepçën’ në mënyrë që teknologjia e saj të modernizohet, performanca e saj të rritet, dhe po ashtu mirëqenia e Mitrovicës dhe e mbarë Kosovës të rritet”, ka deklaruar Rizvanolli.

Rreth 1300 minatorë në vitin 1989 kishin qëndruar për tetë ditë në horizontin e tetë dhe të nëntë në zgafellen e xeherores së Stantërgut, rreth 1 mijë metra nën tokë, në mbrojtje të Kosovës nga politikat shtypëse të Serbisë.
“Në kontekstin historik greva e minatorëve të ‘Trepçës’ mund të cilësohet si rezistencë e dyfishtë, fillimisht si rezistencë aktive paqësore për të mbrojtur ekzistencën e popullit shqiptar në periudhën e okupimit klasik nga Serbia, dhe së dyti si rezistencë e suprimimit arbitrar të autonomisë së Kosovës”, është shprehur kryeshefi ekzekutiv i “Trepçës” Enis Abdurrahmani.

E nga Sindikata e Minatorëve të Shqipërisë, Gëzim Kalaja ka thënë se minatorët duhet të angazhohen për tri çështje.

“Do të deklaroj tri gjëra që ju duhet t’i keni: duhet të luftoni për lidhjen e kontratës kolektive që është Kushtetutë për ju, për ngritjen e pagave e sigurimin teknik dhe për moshën e pensionit dhe ngritjen e pagesës së pensionit”, ka theksuar Kalaja.

Për të shënuar përvjetorin e grevës së minatorëve, Sindikata e Punëtorëve të “Trepçës” ka organizuar aktivitete të ndryshme që do të mbahen deri më 28 shkurt.