Ish-polici mohon se ka kërcënuar me jetë dëshmitarët në rastin e Oliver Ivanoviqit

Në Gjykatën Themelore në Prishtinë është zhvilluar seanca e shqyrtimit fillestar në rastin gjyqësor ndaj ish-policit Milan Mihajloviq. Ai akuzohet se, duke qenë pjesë e grupit kriminal të udhëhequr nga Zvonko Veselinoviq e Milan Radoiçiq, ka kërcënuar me jetë dëshmitarë e zyrtarë, gjatë procesit hetimor për vrasjen e Oliver Ivanoviqit. Mihajloviq i mohoi akuzat

Ish-polici i Kosovës, Milan Mihajoviq, është deklaruar i pafajshëm për katër veprat penale që ndërlidhen me rastin e vrasjes së Oliver Ivanoviqit. Në seancën e shqyrtimit fillestar, prokurori special Burim Qerkini tha se Mihajloviq ishte pjesë e grupit kriminal të udhëhequr nga Zvonko Veselinoviq e Milan Radoiçiq dhe se ai ka kërcënuar me jetë një dëshmitar më 2019-tën.

“Me qëllim të nxitjes së dëshmitarit B1 për të refuzuar dhënien e dëshmisë në këtë procedurë penale e që paraprakisht kishte dijeni se i njëjti është dëshmitar anonim, gjatë bisedës lidhur me vrasjen e Oliver Ivanoviqit i ka thënë ‘mos u bë i marrë, mos më lidh mua me këtë punë’, ndërsa kur i ka thënë se ‘ti e di mirë se kush po i kryen këto vrasje dhe këto krime’, i pandehuri ka kanosur me fjalët ‘mos përmend këto gjëra se për këto të shkon koka’”, tha Qerkini.

Prokurori Qerkini tregoi detaje të aktakuzës edhe për kërcënimin që pretendon se i akuzuari i ka bërë një zyrtari të Inspektoratit Policor më 2021-tën.

“Me të kuptuar se IPK-ja ka filluar hetime ndaj policëve, i pandehuri Milan Mihajloviq përmes telefonit e kërcënon me fjalët e ‘kam siguruar numrin e telefonit tuaj, e di se ku jeton dhe i di të gjitha lëvizjet e tua, kush je ti që më ndjek mua; ke me e pa ti se si përfundon’”, tha prokurori Qerkini.

Mihajloviq akuzohet edhe për falsifikim të dokumenteve, me qëllim që t’i shmangej arrestimit.

“Më datën 19.10.2022, rreth orës 22 e 20 në Mitrovicë, derisa njësitë policore ishin duke kryer arrestimin e të pandehurit, sipas urdhërarrestit të lëshuar nga gjykata, i pandehuri prezantohet se nuk është Milan Mihajloviq, por që është një person tjetër me emrin Zvezdan Adrejiq, ku gjatë kontrolli i është gjetur letërnjoftimi i Republikës së Serbisë, i falsifikuar”, tha Qerkini.

Milan Mihajloviq është deklaruar i pafajshëm lidhur me akuzat e Prokurorisë Speciale. E, kryetari i trupit gjykues, Lufi Shala, e ka njoftuar mbrojtësin e të akuzuarit se i ka 30 ditë kohë për paraqitjen e kundërshtimit të aktakuzës dhe provave. Prokuroria pretendon se veprat për të cilat akuzohet Mihajloviq i ka kryer me katër ish-policët Nedeljko Spasojeviq, Dragisha Markoviq, Rade Basara dhe Zharko Jovaniviq, si dhe me Silvana Arsoviq, sekretare e subjektit politik të Ivanoviqit, dhe me të akuzuarin Marko Roshiq. Ndaj tyre është duke u zhvilluar proces i veçantë gjyqësor, nën akuzat për krim të organizuar lidhur me ndihmë në vrasjen e Ivanoviqit dhe prishje të hetimit për vrasjen e tij. Për të akuzuarit në të dyja rastet, Prokuroria pretendon se kishin qëllim edhe shtrirjen e pushtetit të grupit të Radoiçiqit dhe Veselinoviqit në veri.

Politikani serb Oliver Ivanoviq u vra më 16 janar 2018, pranë zyrës së iniciativës së tij qytetare “Liri, Demokraci, Drejtësi” (Sloboda, demokratija, pravda-SDP). Ai e kritikoi mbështetjen e Listën Serbe nga Beogradi dhe paraqitjen e kësaj si të vetmen alternativë të Serbëve të Kosovës. Në kohën kur u vra ai ishte në proces rigjykimi për krime lufte lidhur me dëbimin e shqiptarëve nga veriu i Kosovës.