Asamblisti i LVV-së dhe katër persona të tjerë kapen duke trafikuar drogë në Shqipëri

Besnik Mujeci, asamblist i Vetëvendosjes, është arrestuar në kryeqytetin e Shqipërisë bashkë me katër persona të tjerë, pasi iu gjetën 11 mijë e 300 tableta të dyshuara si drogë e rëndë, ekstazi. Pesha e drogës, që për destinim kishte bregdetin e frekuentuar, është mbi 5 kilogramë, ndërsa ka vlerë tregu rreth 400 mijë euro. Arrestimi nxiti akuza të opozitës, ndërkaq Vetëvendosja e shkarkoi Mujecin nga anëtarësia dhe çdo funksion në parti.

Asamblisti i Vetëvendosjes në Komunën e Prishtinës, Besnik Mujeci, bashkë me katër persona të tjerë është arrestuar nga Policia e Shqipërisë, nën dyshimin për trafikim droge.

Zyrtari, që partia në pushtet synoi ta bënte aksionar të Stacionit të Autobusëve, në kryeqytet, u kap në flagrancë me një kosovar dhe tre shtetas të Shqipërisë, derisa ndodheshin në afërsi të stacionit të autobusëve në Tiranë.

Policia e Shqipërisë bëri të ditur se atyre iu gjetën 11 mijë e 300 tableta të dyshuara si drogë e rëndë, ekstazi. Pesha e drogës, që për destinim kishte bregdetin e frekuentuar, është mbi 5 kilogramë, ndërsa ka vlerë tregu rreth 400 mijë euro.

“Pasi dërgesat arrinin në Tiranë, transportoheshin me autovetura të marra me qira në Tiranë dhe në qytete të tjera, kryesisht në bregdetin e Shqipërisë, dhe vendet e shkëmbimit caktoheshin në vende publike me shumë lëvizje dhe fluks njerëzish. Për arritjen e marrëveshjeve me shpërndarësit e drogave sintetike në Shqipëri, trafikantët kërkonin pagesa paradhënie, ose edhe lënien e automjeteve si garanci”, ka theksuar drejtori i Policisë në Tiranë, Tonin Vocaj.

Sipas Policisë së Shqipërisë, droga trafikohej nga Kosova.

“Nga hetimet ka rezultuar se këta shtetas, duke shfrytëzuar fluksin e sezonit turistik, i kalonin dërgesat nëpërmjet linjave të autobusëve Prishtinë-Tiranë”, ka theksuar Vocaj.

Pas arrestimit që ka ndodhur në Shqipëri, opozita në Kosovë ka fajësuar autoritetet për mosreagim ndaj njerëzve të lidhur me pushtetin.

“Një gjë po del të jetë e qartë: Në Kosovë, besnikët e Vetëvendosjes nuk zihen kurrë, sepse pushteti i mbron. Ata tregtojnë lirshëm dhe rriten e bëhen dilerë të mëdhenj, si ky asamblist, saqë i kalojnë edhe kufijtë”, ka deklaruar Leutrim R, shef i asamblistëve të PDK-së në Prishtinë.

E kryetari i LDK-së, Lumir Abdixhiku, theksoi se arrestimi i sotëm tregon se jorastësisht partia në pushtet synoi ta bënte Mujecin aksionar në Stacionin e Autobusëve.

“Nuk ka se si të mos rikujtojmë insistimin e opozitës së kryeqytetit, Lëvizjes Vetëvendosje, për ta vendosur të njëjtin asamblist - pikërisht këtë pra - si aksionar në këtë Stacion. Jo Termokos, Prishtina Parking, NPB, Pallat të Rinisë apo dhe secilën ndërmarrje tjetër në kryeqytet, por vetëm në Stacion; aty ku linjat e autobusëve niseshin për çdo ditë”, ka vlerësuar Abdixhiku.

Pas arrestimit, Vetëvendosja e ka përjashtuar nga partia asamblistin Mujeci.

“Komisioni Disiplinor i Lëvizjes Vetëvendosje! në mbledhjen e tij mori vendim për përjashtimin e anëtarit Besnik Mujeci nga anëtarësia dhe të gjitha strukturat e Lëvizjes Vetëvendosje! Lëvizja Vetëvendosje! mbetet e përkushtuar që dukuritë e tilla të dënueshme dhe kundërligjshme, janë absolutisht të patolerueshme dhe do të luftohen e ndëshkohen”, ka shkruar në Facebook, sekretari organizativ i Vetëvendosjes, Alim Rama.

Asamblistit Mujeci dhe katër të arrestuarve të tjerë, përpos tabletave të ekstazisë, u janë sekuestruar edhe një sasi e lëndëve narkotike kanabis, një automjet, si dhe 5 aparate celulare.