Turizmi kulturor në Shqipëri me 1.5 milionë vizitorë

Lokalitetet kulturore të Shqipërisë, nga fillimit të vitit e deri në fund të tetorit, janë vizituar prej afro 1.5 milionë turistë.

Ministri i Turizmit, Kulturës dhe Sportit i Shqipërisë, Blendi Gonxhja, ka shkruar në rrjetet sociale se 1 milion e 431 mijë e 726 vizitorë vendas dhe të huaj kanë zgjedhur të vizitojnë sitet kulturore gjatë periudhës janar–tetor 2025.

Kjo shifër është 56 për qind më e lartë se ajo e vizitorëve të së njëjtës periudhë në vitin 2023.

Muzetë kombëtarë kanë mirëpritur 421 mijë e 661 vizitorë, parqet arkeologjike 602 mijë 059 vizitorë, ndërsa kalatë e monumentet e tjera të kulturës mirëpritën 408 mijë e 6 vizitorë, duke bërë që ky vit të dëshmojë rritje dhe interes të shtuar për trashëgiminë kulturore shqiptare.

Me përfundimin e sezonit turistik në tetor, duke nisur nga nëntori, institucionet e trashëgimisë kulturore do të vijojnë të mirëpresin publikun nga e marta në të dielën, ku e diela e fundit e çdo muaji mbetet ditë me hyrje falas për vizitorët vendas.

Turistët e huaj preferojnë kryesisht turizmin kulturor, ndërkohë që në vitet e fundit po rritet interesi edhe tek ata vendas. Parku më i vizituar mbetet Butrinti.

Në verën e këtij viti Banka Botërore, në një artikull të publikuar në faqen e saj zyrtare, kishte vlerësuar se investimet dhe projektet e ndryshme kanë sjellë nxitjen e turizmit, krijimin e vendeve të punës dhe zhvillim ekonomik, teksa ky realitet i ri po tërheq ish-banorët të kthehen në vendlindjet e tyre dhe po nxit mundësi të reja biznesi dhe zhvillimi.

“Sot gjithçka ka ndryshuar, pasi bashkitë kanë ndërmarrë hapa për të vlerësuar historinë e pasur dhe bukuritë natyrore të zonës, qytete të shpallura Trashëgimi Botërore nga UNESCO-ja, kala antike, arkitekturë osmane, bregdet piktoresk dhe shumë të tjera. Nëpërmjet Projektit për Zhvillimin e Integruar Urban dhe të Turizmit (PIUTD), Qeveria Shqiptare në bashkëpunim me Bankën Botërore, kanë ndihmuar në restaurimin e zonave historike, përmirësimin e infrastrukturës dhe zgjerimin e shërbimeve turistike, duke sjellë mundësi të reja ekonomike dhe vende të reja pune në qytetet e Beratit, Gjirokastrës, Përmetit, Sarandës dhe zonave përreth”, shkruhej në artikull.