-
Nga:
Alberina Haxhijaj
- 26 shkurt 2020 13:21
- Shpërndaje në:
Prishtinë, 26 shkurt – Vjollca Robelli-Mripa, e njohur me emrin skenik AJO, ka bërë një hap përpara në karrierën ndërkombëtare.
Këngëtarja që për muzikën e saj inspirohet nga trashëgimia shqiptare po synon që të fillojë një turne nëpër vende të ndryshme të Evropës, por edhe në SHBA. Austria dhe Gjermani janë destinacionet e para. Në këto dy shtete do të shpalosë elementet e muzikës tradicionale në një ambient të jazzit. Këngëtares, rrugën për të bërë diçka të tillë ia ka hapur koncerti i së premtes, në “Rich Mix”, një nga qendrat më unike dhe më dinamike të artit në Londër.
Në këtë koncert Robelli-Mripa ka prezantuar copëza të traditës shqiptare. Këtë e ka bërë duke interpretuar këngë nga EP-ja “Besa” dhe këngë të tjera të riaranzhuara. “Burrnesha”, “Kënga e Qamiles”, “Baresha”, “Ajo”, “Zogo”, “Zare”, “Nëna”, “Besa”, “Lule Lule” dhe e “E dehur jam”, janë disa prej këngëve që ka dëgjuar publiku londinez. Një program i ngjashëm do të dëgjohet edhe në dy metropolet e mëdha evropiane, në Vjenë më 24 prill dhe në Köln më 25 prill. Ka dy vjet që është duke punuar në projektin “The Besa Journey” (Rrugëtimi i besës) me të cilin synon të prezantojë kulturën e vendlindjes së saj përmes këngëve.
Robelli-Mripa ka thënë se projekti është i tillë që publikut ia mundëson të përjetojë muzikën dhe e dërgon në një rrugëtim nëpër traditën shqiptare.
(Gjerësisht, sot në “Kohën Ditore”)
