-
Nga:
Alberina Haxhijaj
- 27 nëntor 2019 13:01
- Shpërndaje në:
Prishtinë, 27 nëntor – Edicioni i parë i festivalit të baterive në Prishtinë “Prishtina Drum Festival” bëri bashkë tre bateristë të njohur të vendit: Teoman Ukçën, Violand Shabanin dhe Valon Berishën. Koncerti që hapi këtë festivali njëditor nisi me hip-hop, kaloi në death metal e u përmbyll me fusion-funk. Zotësia që bateristët kanë treguar ka marrë me vete publikun në këtë xhiro, duke mos bërë që të vërehet ndryshimi në mes të zhanreve.
“Prishtina Drum Festival”, që u mbajt në “Kino Armata” të hënën mbrëma, u përmbyll me një performancë të përbashkët të tre bateristëve. Organizatorët planifikojnë ta vazhdojnë edhe viteve në vazhdim, në mënyrë që të eliminojnë hapësirën e krijuar në mes të gjeneratave të bateristëve në vend, por edhe për ta promovuar këtë instrument.
Bateristi që e nisi këtë koncert, e njëkohësisht edhe rrugëtimin e Festivalit me të ri në kryeqytet, ishte Valon Berisha. Solli një kombinim të muzikës me DJ e pastaj kaloi te përcjellja me bateri e këngëve të transmetuara në sfond si “Prishtinali jom” nga 2po2, “Bloodah” nga Dafina Zeqiri e “Bye Bye”, bashkëpunimi i saj i fundit me Tayna. Performancën e tij solo e përmbylli me këngë nga BimBima si “038” e “Jeta është e shkurtë”.
Kur Violand Shabani zuri vend në bateritë e tij, me “death-metal” pushtoi “Kino Armatën”. Shabani solli katër këngë “Arch Of Gods” dhe “Thy Warrior” që bendi kosovar “Land of Confusion” i ka publikuar, si dhe dy këngë të tjera po ashtu nga ky grup, “Obscured” dhe “Bane”, që publiku i dëgjoi për herë të parë.
Bateristi Teoman Ukça ishte i fundit që u paraqit në skenë. Ndryshoi përsëri zhanri duke sjellë disa sete nga fusion - funk. Ukça, i cili është edhe mësues i baterive, këtë zanat ua kishte mësuar edhe Berishës e Shabanit.
Granit Paçarada, i cili është baterist i grupit “Offchestra” dhe “Gipsy Groove”, ka thënë se ky festival është gjëja më e mirë që i ka ndodhur Prishtinës kohëve të fundit.
(Gjerësisht, sot në “Kohën Ditore”)
