Arkeologët zbardhin misterin e shtëpive të njerëzve parahistorikë

Kiev, (ORE) – Njerëzit e epokës së akullit përdornin kockat e mamuthëve për t’u mbrojtur nga dimrat e ashpër dhe të ftohtë, rreth 18 mijë vjet më parë.
Në territorin e Ukrainës së sotme, njerëzit parahistorikë, gjuetarë-mbledhës, ndërtonin shtëpi nga kockat e mamuthëve, por deri më tash ishte një lloj misteri se përse e bënin këtë. Lokaliteti i famshëm e paleolitit – Mezhirich – po studiohet sërish. Atje arkeologët kanë gjetur struktura të bëra pothuajse tërësisht nga kockat e mamuthëve. Studimi është publikuar në “Open Research Europe”.
Këto objekte prej kohësh kanë qenë pjesë e debatit nëse ishin shtëpi, depo ushqimore apo monumente rituale? Hulumtimi i ri ofron qasje të tjera duke përdorur teknika të avancuara të datimit me radiokarbon mbi mbetjet e gjitarëve të vegjël të gjetur në të njëjtat shtresa kulturore.
Rezultatet janë mahnitëse. Struktura më e madhe në Mezhirich i përket periudhës 18 mijë e 248 –deri në 17 mijë e 764 vjet më parë, gjatë fazës më të ashpër të epokës së fundit të akullit. Edhe më interesante është se kohëzgjatja e vendbanimit ka qenë e shkurtër. Kjo tregon se këto strehime prej kockash kanë qenë zgjidhje praktike për mbijetesë, e jo banesa të përhershme.
Pse është kjo e rëndësishme? Përveç zgjuarsisë së përdorimit të kockave të mamuthit si material ndërtimi, këto zbulime ndryshojnë mënyrën se si e kuptojmë qëndrueshmërinë dhe përshtatjen njerëzore. Ato tregojnë se si komunitetet arritën të zhvilloheshin në mjedise ekstreme, duke e kthyer mbetjen e kafshëve gjigante në arkitekturë mbrojtëse.
Përderisa metodat e datimit bëhen gjithnjë e më të sakta, lokalitete si Mezhirich vazhdojnë të sfidojnë supozimet e deritanishme për jetën parahistorike. Larg së qenit statike, këto shoqëri kanë qenë dinamike, të zgjuara dhe thellësisht të lidhura me mjedisin e tyre — një mësim që jehon edhe sot.