Një punëtor ka vdekur pasi është rrëzuar nga skelet e një ndërtese në ndërtim në lagjen “Bajram Curri” në Prizren mesditën e së mërkurës.
34-vjeçari fillimisht ishte dërguar në Emergjencën e Spitalit të Prizrenit, e më pas në QKUK ku ka vdekur.
“Viktima, F.A., mashkull 34-vjeçar nga fshati Caravik i Malishevës, fillimisht është dërguar në Emergjencën e Spitalit Rajonal të Prizrenit në gjendje të rëndë, por më vonë, rreth orës 16:30, është njoftuar se ai ka vdekur në QKUK – Prishtinë”, njoftoi PK.
Në lidhje me rastin, i dyshuari N.B., pronar i kompanisë ndërtimore, pas intervistimit me vendim të Prokurorit të Shtetit është ndaluar për 48 orë, si i dyshuar për veprën penale “Asgjësimi, dëmtimi apo heqja e pajisjeve dhe rrezikimi në vendin e punës”.
Inspektorati i Punës: Kompania ku vdiq 34-vjeçari ishte gjobitur dy herë dhe i ishte ndaluar puna
Inspektorati i Punës ka reaguar pas vdekjes së 34-vjeçarit në Prizren i cili u rrëzua nga skelet e një ndërtesë në ndërtim. Në reagim thuhet se kompania që po kryente ndërtimin është gjobitur dy herë për shkelje të rënda të dispozitave për siguri e gjithashtu i ishte ndaluar edhe puna, por sipas Inspektoratit subjekti nuk e respektoi vendimin për ndalim të punimeve, për çka thuhet se u gjobit edhe herën e dytë.
“Gjatë inspektimit të fundit, për shkak të shkeljeve të rënda të dispozitave për siguri dhe shëndet në punë, ishte marrë vendim për ndalimin e përkohshëm të punimeve dhe ishte shqiptuar gjobë ndaj subjektit. Megjithatë, pavarësisht këtij vendimi ligjor, subjekti nuk e kishte respektuar ndalimin dhe kishte vazhduar punimet në kundërshtim me urdhrin e inspektoratit, për çka i ishte shqiptuar edhe një gjobë tjetër”, thuhet në reagim.
Sipas Inspektoratit “ky rast tregon edhe njëherë rëndësinë e respektimit të vendimeve të Inspektoratit të Punës dhe të standardeve ligjore për siguri në punë”.
Inspektorati Qendror i Punës thotë se është duke ndërmarrë të gjitha veprimet ligjore për ndriçimin e plotë të rastit.