Sulmuesi kosovar, Shkëlqim Vladi ka ndryshuar skuadër, por brenda Superligës së Zvicrës.
Vladi të martën është huazuar nga Lugano te skuadra e St. Gallenit. Huazimi është i vlefshëm deri në fund të edicionit 2025/2026.
I pakënaqur me hapësirën në edicionin e kaluar dhe pasi kuptoi se nuk do të ketë hapësirë më shumë as në edicionin e ri, Vladi ka kërkuar kalimin te një skuadër tjetër. Në kontratën e huazimit të 24-vjeçarit është përfshirë opsioni për blerjen e kartonit të tij në fund të edicionit.
Vladi është zhvilluar tek Young Boysi. Kishte periudha huazimi tek Yverdoni dhe Aarau, ndërsa u transferua te Lugano në vitin 2023. Me Luganon i ka shënuar 16 gola dhe bëri shtatë asistime në 76 paraqitje. Tek Aarau ka 19 gola e katër asistime në 36 ndeshje, ndërsa me Yverdonin kishte tri gola e dy asistime në 21 paraqitje.
Vladi në Superligën zvicerane ka 55 ndeshje, dhjetë gola e katër asistime. Në kategorinë e dytë zvicerane ka 53 ndeshje, 21 gola e pesë asistime.
Ai me Luganon ka kontratë edhe dy vjet.
“Kemi qenë të interesuar për Shkëlqimin për një kohë. Kështu që jemi shumë të lumtur që ai bashkohet me ne. Ai është sulmues me goditje të fortë e të rrezikshme. Jemi të bindur se do të përfitojë nga stili ynë i lojës dhe që mund të kontribuojë në lojën tonë me kualitetet që i ka”, ka thënë Roger Stilz, drejtor sportiv i St. Gallenit.
Te St. Galleni janë edhe Behar Neziri, Albert Vallçi, Betim Fazliji dhe Bastien Toma. St. Galleni në xhiron e parë të Superligës së Zvicrës e befasoi kampionin Baselin duke e mposhtur 2:1. Kampionatin e kaluar e përfundoi në pozitën e tetë.