Superliga e Kosovës, xhiroja 31

Goluboviq, hero i Ballkanit në fitoren ndaj Drenicës

Portieri i Ballkanit, Adnan Goluboviq, ka pritur penallti në minutën e katërt të kohës shtesë dhe ia ka siguruar suharekasve fitoren ndaj Drenicës. 

Ballkani fitoi 2:1 të enjten në stadiumin “Bajram Aliu” në Skenderaj, në ndeshjen e xhiros së 31-të. 

Toni Domgjoni fillimisht shënoi supergol në minutën e 36-të për Ballkanin nga gjuajtja e lirë. 

Për 2:0 në të mirë të suharekasve shënoi Festim Alitema në minutën e 54-t, pas asistimit të Almir Kryeziut. 

Golin e vetëm për Drenicën e shënoi Igball Jashari në minutën e 79-të. Jashari fitoi penallti në minutën e 90-të pasi u pengua në zonë. Penalltia u dha pas rishikimit të situatës në VAR. Ekzekutimin e penalltisë e mori përsipër Ronaldo Chacon. Por, penalltinë e Chaconit e kuptoi slloveni Goluboviq dhe e priti atë në minutën e 94-t. 

Me fitore, Ballkani i ka 55 pikë, pesë më pak se Drita lidere. 

Drenica në vendin e shtatë i ka 38 pikë, dy më shumë se Llapi i teti, përkatësisht në zonën e barazhit.

Dukagjini fiton “finalen e parë” me Ferizajn

Dukagjini i Klinës e ka fituar “finalen e parë” kundër Ferizajt të enjten pasdite. 

Klinasit fituan në udhëtim ndaj Ferizajt me rezultat 2:1, në ndeshjen që i takoi xhiros së 31-të të Superligës së Kosovës në futboll.

Dukagjini fitoi me golat e realizuar nga Hekuran Berisha në minutën e 41-të dhe Dienit Isufit në minutën e 51-të.

Golin e nderit për Ferizajn e shënoi Betim Haxhimusa në minutën e fundit.

Ferizaj nga minuta e 78-të luajti me një lojtarë më pak në fushë. 

Me karton të kuq u përjashtua Ruben Cornelious. 

Me fitore, Dukagjini i është larguar edhe më shumë zonës së barazhit dhe rënies direkt nga elita.

Dukagjini është në vendin e gjashtë me 41 pikë.

Ferizaj është i parafundit me 33 pikë, tri pikë më pak se Llapi i vendit të tetë.

Vendi i tetë do të paraqitet në barazh për mbetje në elitë.

Ferizaj e Dukagjini do të përballen edhe në finale të Kupës së Kosovës më 21 maj në “Fadil Vokrri”.

Ferizaj shënon ndaj Dukagjinit

Betim Haxhimusa ka shënuar gol ndaj Dukagjinit dhe tani rezultati është 2:1 në të mirë të skuadrës klinase. 

Haxhimusa shënoi për Ferizajn në minutën e 90-të.

Drenica nuk dorëzohet

Drenica nuk është dorëzuar në ndeshjen ndaj Ballkanit. 

Ka shënuar gol dhe tani rezultati është 2:1. 

Igball Jashari realizoi në minutën e 79-të me gjuajtje të saktë nga zona.

Ballkani shënon tjetër gol

Ballkani ka shënuar tjetër gol në “Bajram Aliu” në Skenderaj ndaj Drenicës. 

Shënues i golit për 2:0 ishte Festim Alidema. 

Alidema në minutën e 54-t shënoi nga afërsia pas asistimit të Almir Kryeziut.

Tjetër supergol në Ferizaj

Tjetër supergol është shënuar në terrenin me bar sintetik në Ferizaj. 

Dienit Isufi i Dukagjinit ka realizuar me gjuajtje shumë të fuqishme e të saktë në minutën e 51-të, për epërsinë 2:0 të Dukagjinit ndaj Ferizajt.

Pjesa e parë e ndeshjes në Ferizaj i takon Dukagjinit

Dukagjinit të Klinës i ka takuar pjesa e parë e ndeshjes në Ferizaj.

Golin për rezultatin 1:0 e shënoi Hekuran Berisha në minutën e 41-të të ndeshjes kundër Ferizajt, në kuadër të xhiros së 31-të të Superligës së Kosovës në futboll.

Të dyja skuadrat po luftojnë për t’i shpëtuar rënies nga elita kosovare e futbollit.

Ferizaj e Dukagjini do të përballen edhe në finale të Kupës së Kosovës më 21 maj në “Fadil Vokrri”.

Ballkani në epërsi pas pjesës së parë

Ballkani e ka mbyllur me epërsi prej një goli pjesën e parë të ndeshjes ndaj Drenicës në udhëtim.

Pjesa e parë e xhiros së 31-të të Superligës që po luhet në stadiumin “Bajram Aliu” në Skenderaj, u mbyll 1:0 në të mirë të skuadrës suharekase.

Realizues i supergolit ishte mesfushori Toni Domgjoni, në minutën e 36-të.

Dukagjini në epërsi

Dukagjini ka shënuar gol në Ferizaj.

Golin e epërsisë 1:0 ndaj Ferizajt, për Dukagjinin e shënoi Hekuran Berisha në minutën e 41-të.

Supergol nga Domgjoni, Ballkani në epërsi

Mesfushori Toni Domgjoni ka realizuar supergol nga goditja e dënimit për Ballkanin, që është duke fituar ndaj Drenicës në udhëtim 1:0.

Domgjoni shënoi me gjuajtje të saktë. 

Ndeshja i takon xhiros së 31-të të Superligës.