Skuadra që bën gara në kategorinë e dytë të futbollit anglez, Bristol City, po insiston në transferimin e mbrojtësit Leart Paçarada.
Kështu ka shkruar të hënën “Kicker”.
Paçarada luan për skuadrën gjermane, Koln.
Nuk përjashtohet mundësia që Paçarada të largohet nga Kolni për t’iu bashkuar Bristol Cityt.
Trajneri i Bristol Cityt, Gerhard Struber, e njeh mirë Paçaradën. Struber ka punuar me reprezentuesin e Kosovës edicionin e kaluar te Kolni.
Tri ndeshje pa përfunduar kampionati i kaluar, Struber u shkarkua nga drejtuesit e Kolnit.
Pas largimit të Max Finkgrafes, Paçarada mbetet zgjedhja e vetme e klubit anglez në pozicionin e mbrojtësit të krahut të majtë. Deri më tani nuk ka asgjë zyrtare.
30-vjeçari me Kolnin ka kontratë deri në verën e vitit të ardhshëm.
Me Kosovën, mbrojtësi me përvojë ka një gol të shënuar në 30 ndeshje të zhvilluara.
