Kapitenia e Suedisë në futboll, Kosovare Asllani, ka thënë se e respekton Anglinë por nuk ka frikë nga kampionia në fuqi e Evropës.
Ajo tha se te Suedia kanë besim dhe se janë të etura për fitore.
“Aspekti fizik ka qenë gjithmonë pikë e fortë në ekipin tonë dhe kjo është diçka që duhet ta shfrytëzojmë. Anglia ka shumë talente dhe ne i respektojmë shumë, por gjithashtu kemi një plan loje drejt të cilit kemi punuar. Gjëja më e rëndësishme është të jemi me këmbë në tokë dhe t’i analizojmë ato. Shpresojmë që të mund ta zbatojmë planin tonë të lojës me sukses”, ka thënë Asllani në konferencën e mbajtur për media të mërkurën.
Ndeshja çerekfinale e Evropianit ndërmjet Suedisë dhe Anglisë luhet të premten nga ora 21:00.
Evropiani po mbahet në Zvicër, ndërsa Asllani e ka udhëhequr Suedinë në tri ndeshjet e fazës grupore me tri asistime dhe një gol.
