Ai ka 1378 paraqitje në nivelin e të rriturve, ka debutuar në vitin 1997 dhe është lojtari më i vjetër në Kupën e Botës për Klube.
Portieri brazilian i Fluminenses, Fabio Deivson Lopes Macila, ka tashmë karrierë impresive dhe nuk po tregon shenja të ndaljes.
44-vjeçari shkëlqeu të hënën në fitoren 2:0 të Fluminenses ndaj Interit në një të tetën e finales në Botërorin e Klubeve. E ndihmoi ekipin brazilian të kualifikohet në çerekfinale të Kupës së Botës për Klube, ku do të përballet me Al-Hilalin.
Fabio bëri katër pritje, duke përfshirë një vendimtare me këmbë, ndërsa fituesja e Copa Libertadores 2023 tronditi nënkampionin e Ligës së Kampionëve të UEFA-s.
Fabio bën që 40-vjeçari Thiago Silva të duket i ri, ndërsa të dy u tallën me moshën e tyre në ndeshjen e luajtur në temperaturë prej 33 gradë Celsius.
Vetëm katër ditë më parë Fabio bëri histori duke e mbajtur portën të paprekur në ndeshjen e 507-të. E kaloi Gianluigi Buffonin. Tani braziliani ka 508 ndeshje pa gol të pësuar.
Fabio tani synon një tjetër rekord mbresëlënës – atë për më së shumti paraqitje në futbollin Botëror.
Sipas Librit të Rekordeve të Guinnessit, ish-portieri i Anglisë, Peter Shilton, mban rekordin me 1390 paraqitje. Vetë Shiltoni pretendon se i ka luajtur 1387 ndeshje.
Por nuk është plotësisht i qartë rekordi që Fabio tani e synon.
Shiltoni ka të evidentuara 1249 ndeshje në karrierën me klube dhe rekord prej 125 ndeshjesh me Anglinë. Kjo do të thotë se ai i ka 1374 paraqitje.
Pra, pse Fabio nuk është tashmë rekordmen? Ai ka luajtur gjithë karrierën e tij në Brazil dhe nuk është paraqitur asnjëherë për përfaqësuesen ndonëse e fitoi Botërorin U19 në vitin 1997.
Sipas “England Football Online”, Shiltoni i ka 13 paraqitje për Anglinë U23 dhe kjo e dërgon shifrën në 1387 ndeshje, të cilat portieri legjendar pretendon se i ka.
Ka vlerësime të ndryshme nëse paraqitjet për ekipin U23 duhet të llogariten si paraqitje për të rriturit. Por Fabio kërkon të heq dilemat duke e kaluar shifrën e ndeshjeve të Shiltonit.
Është çështje kohe para se ta kalojë shifrën e 1387 ndeshjeve apo 1390 ndeshjeve. Ai mbush 45 vjet në shtator, por ka nënshkruar kontratë të re në maj, të vlefshme deri në fund të vitit 2026. Dhe duket thuajse e sigurt se rekordi do të jetë i tij.
Sa do të qëndrojë rekordi, është pyetje tjetër.
40-vjeçari Cristiano Ronaldo është paraqitur në 1281 ndeshje për skuadra dhe për Portugalinë, në nivelin e të rriturve. Sulmuesi i Al-Nassr është vetëm 62 gola larg shifrës prej 1000 golave në karrierë. Ronaldo së fundi nënshkroi kontratë të re dhe padyshim do të ndjekë edhe rekordin e Shiltonit dhe potencialisht të Fabios.
Fabio e ka arritur shifrën e mahnitshme të ndeshjeve duke luajtur për skuadrat braziliane si Uniao Bandeirante, Atletico Paranaense, Vasco de Gama, Cruseiro dhe Fluminense. Te Fluminense është prej vitit 2022.
