“In The Making II” me kukulla në mbrojtje të ambientit 

“Galeria 17” është ambienti ku u jepet zë temave të ndryshme. Mbrojtja e ambientit është prej kryesoreve. Por, tek ekspozita  “In the Making II” janë fëmijët ata që thërrasin për mbrojte të ambientit nga tekstilet. 

Rreth 80 fëmijë e të rinj janë angazhuar në punëtorinë e udhëhequr nga artisti Dardan Zhegrova duke dizajnuar, qepur e punuar kukulla prej më të ndryshmeve. Janë dhjetëra krijime artistike e si mozaik secila bartte mesazhin e vet. Por, kësaj radhe jo veç për mbrojtje të ambientit. 

Ekologjia queer është një prej shtyllave të “Galerisë 17” që funksionon në kuadër të fondacionit “Shtatëmbëdhjetë”. Kjo ekspozitë po ashtu hyn te politikat e fondacionit që midis të tjerash ka në fokus edhe mbrojtjen e ambientit bashkë me rolin e artit në këtë aspekt. 

Përdorimi i materialeve të tekstilit të sjella nga fëmijët është njëfarë riciklimi më vete dhe vjen si thirrje për më shumë riciklim e më pak ndotje për ambientet ku rriten fëmijët.