Yamali rrezikon ta thyejë ligjin në duelin me Shqipërinë

Superylli i Barcelonës dhe Spanjës, Lamine Yamal, rrezikon ta thyejë ligjin në Gjermani nëse luan përtej një ore të caktuar në mbrëmje.

Spanja ballafaqohet me Shqipërinë në ndeshjen e fundit të fazës grupore në Evropian, dhe Yamali, 16-vjeçar, pritet të jetë pjesë e skuadrës.

Ai vlerësohet prej më të mirëve aktualisht te Spanja dhe në gjithë Evropianin.

Megjithatë, ligji në Gjermani thotë se personat nën moshën 18-vjeçare nuk lejohen të punojnë përtej orës 20:00.

Ka përjashtime për sportistë, të cilët mund të luajnë deri në orën 23:00, por pjesa e dushit pas ndeshjes si dhe detyra me media, llogariten si punë.

Yamali padyshim se do të ketë mundësi të luajë sërish për Spanjën, por nëse e thyen ligjin, mund të përballet me dënim, ka shkruar “Football-Espana” të dielën.

Yamali në ndeshjen kundër Italisë, që nisi në orën 21:00 të enjten, luajti për 71 minuta.