Polaku Kacper Kozlowski është lojtari më i ri që ka luajtur në Kampionatin Evropian të futbollit. Kur luajti në “Euro 2020”, Kozlowski i kishte 17 vjet e 246 ditë.
Ai rekord megjithatë kërcënohet seriozisht në “Euro 2024”, shkruan sajti zyrtar i UEFA-s. Është ylli i ri i Spanjës, Lamine Yamal, që pritet të jetë rekordmen i ri. Kur Spanja të takohet me Kroacinë në xhiron e parë të fazës grupore në “Euro 2024”, Yamali do t’i ketë 16 vjet e 338 ditë. Yamal jo vetëm që pritet të luajë, por ka gjasa të mëdha të jetë startues.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoEvropiani i kaluar ishte edhe i futbollistëve të rinj. Kozlowski, që ishte pjesë e skuadrës polake Pogon Szczecin, theu rekordin që e kishte vendosur gjashtë ditë më herët Jude Bellingham i Anglisë. Bellinghami kishte luajtur me 17 vjet e 349 ditë, ndërsa mesfushori polak i kishte 17 vjet e 246 ditë kur hyri në vend të Mateusz Klich në barazimin 1:1 ndaj Spanjës, në fazën grupore.
Jetro Willems i Holandës kishte luajtur në vitin 2012 me 18 vjet e 71 ditë. Enzo Scifo i kishte 18 vjet e 115 ditë kur luajti për Belgjikën në “Euro 1984”. Ndërkohë Jamal Musiala luajti për Gjermaninë në “Euro 2020” me 18 vjet e 117 ditë. Këta janë futbollistët më të rinj që kanë luajtur deri më tani në kampionate evropiane.
Sa u takon portierëve, më i riu që ka luajtur në kampionatin kontinental është Jose Angel Iribar. Ai ishte paraqitur për Spanjën ndaj Hungarisë më 17 qershor të vitit 1964, kur i kishte 21 vjet e 108 ditë.
Më i riu që ka shënuar gol në Kampionat Evropian është Johan Vonlanthen. Ai kishte realizuar në ngjarjen e madhe me 18 vjet e 141 ditë. Kjo kishte ndodhur më 21 qershor të vitit 2004, në humbjen 3:1 të Zvicrës nga Franca. Vonlanthen ishte te Zvicra.
Me 18 vjet e 4 ditë, Bellinghami, ylli aktual i Anglisë, është më i riu që është paraqitur në ndeshje të fazës nokaut në Evropian.
Ndërkohë më i riu që është paraqitur në finale është Renato Sanchez i Portugalisë. Ai luajti në ndeshjen finale në “Euro 2016” me 18 vjet e 328 ditë.
Sa i takon më të riut që ka shënuar gol në finale, duhet të kthehemi shumë mbrapa. Pietro Anastasi i kishte 20 vjet e 64 ditë kur realizoi për Italinë, në finalen e përsëritur ndaj Jugosllavisë së atëhershme, në vitin 1968.
Yamali mund të thyejë një pjesë të konsiderueshme të këtyre rekordeve në Evropianin në Gjermani, që fillon të premten.