-
Përktheu:
Blerta Haxhiu
- 30 janar 2026 12:56
- Shpërndaje në:
Presidenti i Ukrainës, Volodymyr Zelensky, deklaroi të premten se vendi i tij është i gatshëm të veprojë në mënyrë reciproke nëse Rusia ndalon sulmet ndaj infrastrukturës energjetike ukrainase, të cilat kanë shkaktuar ndërprerje të gjata të energjisë dhe kanë ekspozuar Kievin ndaj të ftohtit ekstrem”. Ai theksoi se aktualisht nuk ekziston një armëpushim formal mes dy vendeve, raporton Reuters.
Një ditë më parë, presidenti i SHBA-së, Donald Trump, tha se presidenti rus Vladimir Putin kishte rënë dakord të mos godiste Kievin për një javë, për shkak të kushteve të ashpra të motit. Temperaturat në kryeqytetin ukrainas pritet të zbresin deri në minus 26 gradë celsius të dielën.
Zelensky sqaroi se mundësia për uljen e tensioneve ishte propozuar nga Shtetet e Bashkuara gjatë bisedimeve trepalëshe për paqe, të mbajtura fundjavën e kaluar në Abu Dhabi. Ai shtoi se data ose vendi ku do të mbahet raundi i ardhshëm i bisedimeve, aktualisht i planifikuar për këtë të diel në Emiratet e Bashkuara Arabe, mund të ndryshojë.
“Pala amerikane tha se dëshiron ta ngrejë çështjen e uljes së përshkallëzimit, me të dyja palët që do të ndërmarrin hapa konkretë për të shmangur përdorimin e kapaciteteve me rreze të gjatë veprimi, me qëllim krijimin e hapësirës më të madhe për diplomaci”, u shpreh Zelensky para gazetarëve në Kiev, sipas deklaratës së publikuar nga zyra e tij.
“Në këtë fazë, kjo është një nismë e palës amerikane dhe personalisht e presidentit të Shteteve të Bashkuara. Ne e shohim atë si një mundësi, jo si një marrëveshje”, shtoi ai.
Nga Kremlini zyrtar nuk pati menjëherë ndonjë reagim lidhur me propozimin për një armëpushim të përkohshëm në sektorin energjetik.
Forcat Ajrore të Ukrainës njoftuan të premten se Rusia ka lëshuar një raketë balistike dhe 111 dronë gjatë sulmeve të natës ndaj territorit ukrainas.
Zyrtarë rajonalë raportuan sulme ajrore në zonat e vijës së frontit, por nuk pati njoftime për goditje ndaj objektivave energjetike.
Ndërkohë, trupat ruse po vazhdojnë avancimin e ngadaltë në rajonin lindor të Donetskut, ndërsa Moska kryen pothuajse çdo ditë sulme me qindra dronë ndaj qyteteve dhe qytezave ukrainase, edhe larg vijës së frontit.