-
Përktheu:
Flutura Gashi-Mehmeti
- 13 gusht 2025 07:58
- Shpërndaje në:
Udhëheqësit e Evropës dhe Ukrainës do të flasin me presidentin e SHBA-së Donald Trump në një takim virtual të mërkurën, përpara samitit të tij me Vladimir Putinin.
Trumpi do të presë Putinin për bisedime në Alaska të premten, për të cilat presidenti i SHBA-së ka thënë se do të shërbejnë si një takim "ndjekës" në përpjekjet e tij për t'i dhënë fund luftës në Ukrainë, raporton Reuters.
Trumpi ka rënë dakord javën e kaluar për samitin e parë SHBA-Rusi që nga viti 2021.
Presidenti i SHBA-së thotë se si Kievi ashtu edhe Moska do të duhet të lëshojnë territor për t'i dhënë fund luftës. Trupat ruse kanë pushtuar tashmë pothuajse një të pestën e Ukrainës.
Paparashikueshmëria e mënyrës se si do të zhvillohet samiti ka ushqyer frikën e evropianëve se udhëheqësit e SHBA-së dhe Rusisë mund të marrin vendime me ndikim të gjerë dhe madje të përpiqen ta detyrojnë Ukrainën të arrijë një marrëveshje të pafavorshme.
Mirëpo administrata e Trumpit ka zbutur pritjet të martën për përparim të madh drejt një armëpushimi, duke e quajtur takimin e tij me Putinin në Alaska një "ushtrim dëgjimi".
Sekretari i përgjithshëm i NATO-s do të marrë pjesë gjithashtu në konferencën e organizuar nga kancelari gjerman, Friedrich Merz.
Ukraina shpreson që takimi do të shërbejë - të paktën pjesërisht - si një kundërpeshë evropiane ndaj samitit në Alaska.
Zelensky thotë se aleatët e Ukrainës duhet ta detyrojnë Rusinë të bëjë paqe
Photo: Associated Press
Presidenti ukrainas, ka bërë sërish thirrje që të ushtrohet presion ndaj Rusisë për hir të një paqeje të drejtë.
Në një postim në X, presidenti i Ukrainës, pak para takimit virtual të tij të mërkurën me liderët evropianë dhe presidentin amerikan, Donald Trump, Zelensky ka thënë se: Përvoja e Ukrainës dhe e partnerëve tanë duhet të përdoret për të parandaluar mashtrimin nga Rusia.
“Aktualisht, nuk ka asnjë shenjë se rusët po përgatiten t'i japin fund luftë”, ka thënë Zelensky.
Ai ka shtuar se duke punuar së bashku, Ukraina, SHBA-ja, Evropa dhe kombet e tjera aleate e detyrojnë Rusinë të bëjë paqe.
Takimi virtual mes Zelenskyt, liderëve evropianë dhe Trumpit dy ditë para samitit të parë Trump-Putin që nga fillimi i luftës në Ukrainë.
Zelensky shkon në Berlin për takimin me Trumpin
Photo: Associated Press
Presidenti i Ukrainës Volodymyr Zelensky, do të vizitojë Berlinin të mërkurën për t'u bashkuar me kancelarin gjerman, Friedrich Merz për bisedime me udhëheqësit evropianë dhe amerikanë përpara samitit Trump-Putin më vonë këtë javë, ka thënë qeveria gjermane.
Merzi ka organizuar një seri takimesh virtuale të mërkurën në një përpjekje për të dëgjuar zërin e udhëheqësve evropianë dhe ukrainas përpara një samiti nga i cili ata janë lënë mënjanë, raporton AP.
Zelensky pritet të takohet fillimisht me udhëheqësit evropianë, në përgatitje të një telefonate virtuale me presidentin e SHBA-së, Donald Trump dhe zëvendëspresidentin JD Vance rreth një orë më vonë.
Një telefonatë midis udhëheqësve të vendeve të përfshira në "koalicionin e të vullnetshmëve" - ata që janë të përgatitur të ndihmojnë në kontrollin e çdo marrëveshjeje të ardhshme paqeje midis Moskës dhe Kievit, do të zhvillohet e fundit.
Të mërkurën, Merzi është zotuar të ndihmojë Ukrainën të zhvillojë sistemet e veta të raketave me rreze të gjatë veprimi që do të jenë të lira nga çdo kufizim i imponuar nga Perëndimi në përdorimin dhe objektivat e tyre, ndërsa qeveria e Kievit lufton për të sprapsur pushtimin e Rusisë.
Zelensky ka vizituar për herë të fundit Berlinin në fund të majit.
Takimi Trump-Putin do të zhvillohet të premten në Alaska.