Presidentja e Komisionit Evropian, Ursula von der Leyen, ka shprehur solidaritet të plotë me Lituaninë pas incidentit me balonat që kanë hyrë në hapësirën e saj ajrore, duke i cilësuar si provokim dhe kërcënim hibrid që Bashkimi Evropian nuk mund ta tolerojë.
Ajo theksoi se ngjarja tregon nevojën për rritjen e gatishmërisë ushtarake të BE-së dhe investime të reja në pajisje dhe dronë për të mbrojtur territorin evropian, shkruan TheGuardian.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoNdërkohë Komisioni Evropian po përcjell nga afër shqetësimet e disa liderëve për planin që parashikon përdorimin e aseteve të ngrira ruse për të garantuar një kredi për Ukrainën.
Zëdhënësja e BE-së, Paula Pinho, tha se Komisioni po punon që propozimi të jetë plotësisht në përputhje me të drejtën ndërkombëtare, ndërsa von der Leyen e quajti idenë ligjërisht të shëndoshë, megjithatë jo edhe të thjeshtë.
Shtetet nordike – Suedia, Danimarka, Finlanda dhe Norvegjia – mbështetën fuqishëm këtë plan dhe shpresojnë të bindin Belgjikën, e cila ende ka dyshime ligjore, duke theksuar se Rusia mbetet kërcënimi më i madh për rajonin, por theksuan se nuk janë të frikësuar, vetëm të përgatitur.
Kryeministrja e Danimarkës, Mette Frederiksen paralajmëroi se Evropa po përballet me rrezikun më të madh që nga Lufta e Dytë Botërore, pasi Rusia “po përpiqet të dobësojë dhe ndajë shoqëritë tona”.
Finlanda shtoi se lufta në Ukrainë dhe sjellja e rrezikshme e Rusisë në Detin Baltik e kanë kthyer rajonin në një “zonë të nxehtë”.
Presidenti autoritar i Bjellorusisë, Aleksandër Lukashenko, nga ana tjetër ka reaguar ndaj vendimit të Lituanisë për të mbyllur kufirin për shkak të balonave që kanë ndërprerë trafikun ajror, duke e quajtur justifikim absurd.
Ai gjithashtu kritikoi ashpër planin e BE-së për përdorimin e aseteve të ngrira ruse, duke e quajtur “vjedhje”.
Por, presidenti ukrainas Volodymyr Zelenksy po pret që çështja e asteve të ngrira ruse të zgjidhet derisa kërkoi mbështetje të qëndrueshme financiare nga BE-ja për të vazhduar mbrojtjen nga lufta e Rusisë.
Ndryshe nga BE-ja dhe shtetet nordike, kryeministri i Hungarisë Viktor Orban, vazhdon të kundërshtoj sanksionet ndaj Rusisë, duke iu referuar atyre të fundit nga SHBA-ja, ndaj industrisë së naftës ruse.