Vala e të nxehtit në Evropë po zhvendoset nga lindja

Kushtet e valës së të nxehtit që kanë përfshirë prej ditësh Spanjën, Francën dhe Mbretërinë e Bashkuar pritet të zhvendosen drejt lindjes, ndërsa meteorologët në Gjermani dhe Republikën Çeke po paralajmërojnë për temperatura ekstreme.

Temperaturat në Gjermani mund të arrijnë deri në 40 gradë celsius në disa zona perëndimore dhe jugperëndimore të enjten, ndërsa të premten temperaturat e larta pritet të përfshijnë pothuajse të gjithë vendin. 

Një paralajmërim për mot ekstrem është tashmë në fuqi në pjesën më të madhe të Republikës Çeke.

Në Francë, kryeministri Sebastien Lecornu ka njoftuar se niveli i alarmit shëndetësor do të ngrihet në shkallën më të lartë, me qëllim rritjen e personelit në spitale dhe mbrojtjen e grupeve më të rrezikuara.

Ministrja e Shëndetësisë, Stephanie Rist, ka thënë se tashmë po regjistrohen vdekje të lidhura me temperaturat ekstreme jo vetëm tek të moshuarit, por edhe tek të rinjtë.

Kreu i klimës në Kombet e Bashkuara, Simon Stiell, ka deklaruar se “vala e egër e të nxehtit në Evropë mban qartë gjurmët e krizës klimatike”, duke bërë thirrje për një kalim më të shpejtë drejt energjive të rinovueshme, mbrojtjen e pyjeve dhe forcimin e qëndrueshmërisë ndaj ndryshimeve klimatike.

Pasi Franca ka regjistruar të mërkurën ditën më të nxehtë për të dytën herë radhazi, rekordet vazhdojnë të thyhen. 

Shërbimi meteorologjik Meteo-France ka njoftuar se temperatura minimale mesatare gjatë natës të së mërkurës, ka arritur në 22 gradë celsius. Në qytetin Nantes, në veriperëndim të vendit, temperatura ka arritur në 27.2 gradë celsius.

Kryetari i bashkisë së Parisit, Emmanuel Gregoire, ka thënë se shkalla e vdekshmërisë po rritet në Paris, ku temperaturat e larta kanë vazhduar prej disa ditësh.

Ndërkohë, një fëmijë trevjeçar është gjetur i vdekur në një veturë në rajonin e Parisit, vetëm disa ditë pasi dy fëmijë të vegjël u gjetën të vdekur në veturën e familjes së tyre në qytetin jugor, Carpentras.