-
Përktheu:
Flutura Gashi-Mehmeti
- 25 qershor 2025 15:26
- Shpërndaje në:
Presidenti rus, Vladimir Putin nuk do të udhëtojë për në samitin e BRICS-it javën e ardhshme në Brazil për shkak të një urdhërarresti të lëshuar kundër tij nga Gjykata Ndërkombëtare Penale (GJNP), ka thënë të mërkurën ndihmësi i politikës së jashtme të Kremlinit, Yuri Ushakov.
GJNP-ja ka lëshuar urdhërarrestin në vitin 2023, pak më shumë se një vit pasi Rusia nisi luftën e saj në shkallë të plotë kundër Ukrainës, duke akuzuar Putinin për krime lufte për deportimin e qindra fëmijëve nga Ukraina.
Rusia mohon akuzat për krime lufte dhe Kremlini, i cili nuk e nënshkroi traktatin themelues të GJNP-së, e ka hedhur poshtë urdhërarrestin si të pavlefshëm.
Por kjo do të thotë që Putin duhet të peshojë rrezikun që mund të arrestohet nëse udhëton në një vend tjetër që është nënshkrues i traktatit të GJNP-së.
Në vitin 2023 ai vendosi të mos udhëtonte në një vend të tillë, Afrikën e Jugut, për një samit të BRICS.
Por vitin e kaluar atij iu bë një pritje me qilim të kuq në Mongoli, edhe pse është një shtet anëtar i GJNP-së.
Ushakov ka thënë se Putini do të merrte pjesë nëpërmjet një videolidhjeje në samitin e BRICS më 6-7 korrik në Brazil.
