-
Përktheu:
Flutura Gashi-Mehmeti
- 26 qershor 2025 11:20
- Shpërndaje në:
Krerët e 27 vendeve anëtare të Bashkimit Evropian do të takohen të enjten në Bruksel për të diskutuar sanksione më të ashpra ndaj Rusisë, mënyrat për të parandaluar tarifat e reja të dhimbshme të SHBA-së dhe si t'i bëjnë zërat e tyre të dëgjohen në konfliktet e Lindjes së Mesme.
Shumica e udhëheqësve vijnë nga një samit i shkurtër por intensiv i NATO-s, ku ata premtuan një rritje të madhe të shpenzimeve të mbrojtjes dhe mbuluan disa nga mosmarrëveshjet e tyre me presidentin e SHBA-së, Donald Trump, raporton AP.
Presidenti ukrainas, Volodymyr Zelensky, do t'i bashkohet samitit të BE-së me anë të videokonferencës, pasi u takua me Trumpin të mërkurën. NATO-ja e udhëhequr nga SHBA-ja e ka ulur Ukrainën nga një përparësi kryesore në një lojtar anësor këtë javë, por lufta e Rusisë në Ukrainë mbetet një shqetësim i madh për BE-në.
Anëtarët do të diskutojnë një rund të 18-të sanksionesh kundër Rusisë dhe nëse do të mbahet një kufizim çmimesh për naftën ruse, masa që disa vende i kundërshtojnë sepse mund të rrisin çmimet e energjisë.
Ndërkohë, tarifat e Trumpit po rëndojnë mbi BE-në, e cila negocion marrëveshje tregtare në emër të të gjitha 27 vendeve anëtare. Ai ka sulmuar Spanjën të mërkurën për mos shpenzimin më shumë për mbrojtjen dhe sugjeroi edhe më shumë tarifa. Ndërkaq, presidenti i Francës, Emmanuel Macron e ka kritikuar ashpër Trumpin për nisjen e një lufte tregtare me aleatët e hershëm.
Udhëheqësit evropianë janë gjithashtu të shqetësuar për pasojat e luftërave në Lindjen e Mesme, dhe BE-ja po bën presion për të ringjallur negociatat diplomatike me Iranin mbi programin e tij bërthamor.
Anëtarët e BE-së kanë po ashtu mosmarrëveshje të brendshme për të kapërcyer. Ata janë të ndarë se çfarë duhet të bëjnë në lidhje me politikën evropiane ndaj Izraelit për shkak të sjelljes së tij në Gaza.
Mbrojtja dhe siguria pritet të jenë në krye të agjendës. Samiti do të përfundojë me një deklaratë përfundimesh që do të përcaktojë agjendën e bllokut për katër muajt e ardhshëm dhe mund të shihet si një tregues i ndjenjës politike në Evropë mbi çështjet kryesore rajonale dhe globale.
