Presidenti i SHBA-së, Donald Trump, të premten përkrahu ndryshimin e mundshëm të regjimit në Iran dhe deklaroi se së shpejti do të ketë "fuqi të jashtëzakonshme" në Lindjen e Mesme, ndërsa Pentagoni dërgoi një aeroplanmbajtëse të dytë në rajon.
Lëvizjet ushtarake dhe fjalimet e ashpra të Trumpit vijnë ndërsa Washingtoni dhe Teherani kërkojnë të ringjallin diplomacinë mbi mosmarrëveshjen e gjatë bërthamore të Teheranit me Perëndimin. I pyetur nëse donte ndryshim regjimi në Iran, Trump u përgjigj se ajo do të ishte gjëja më e mirë që mund të ndodhte. Ai nuk pranoi të tregonte se kush donte të merrte përsipër Iranin, por tha se "ka njerëz".
Burime të Reutersit kanë thënë se i dërguari i SHBA-së, Steve Witkoff dhe Jared Kushner, do të zhvillojnë negociata me Iranin të martën në Gjenevë, me përfaqësues nga Omani që veprojnë si ndërmjetës.
Washingtoni dëshiron që bisedimet bërthamore me Iranin të përfshijnë edhe raketat balistike të vendit, mbështetjen për grupet e armatosura në rajon dhe trajtimin e popullit iranian. Irani ka thënë se është i përgatitur të diskutojë kufizimet e programit të tij bërthamor në këmbim të heqjes së sanksioneve, por ka përjashtuar lidhjen e çështjes me raketat.