Presidenti amerikan, Donald Trump, ka shkruar në rrjetin social “Truth Social” se India dhe Pakistani janë pajtuar për armëpushim të plotë dhe të menjëhershëm.
Trumpi ka bërë të ditur se armëpushimi u arrit pas një nate të gjatë negociatash me ndërmjetësim të SHBA-së.
“Urime për të dyja vendet që kanë përdorur arsyen e shëndoshë dhe inteligjencën e lartë. Faleminderit për vëmendjen tuaj sa i përket kësaj çështjeje!”, ka shtuar presidenti amerikan.
Këtë lajm të presidentit amerikan, e kanë konfirmuar zyrtarë të Indisë e Pakistanit.
Tensionet mes Indisë dhe Pakistanit përshkallëzuan në orët e hershme të martën pasdite (me kohën tonë lokale), kur India sulmoi atë që e quajti “infrastrukturë terroriste” të Pakistanit, dy javë pasi e kishte akuzuar vendin islamik për përfshirje në sulmin i cili la të vdekur 26 persona në Kashmirin e kontrolluar nga India.
Islamabadi ka mohuar akuzat dhe ka sulmuar disa baza ushtarake në Indinë veriore.
Raportohet për shpërthime pak pas arritjes së marrëveshjes për armëpushimin Indi-Pakistan
Foto: Arkiv
Është raportuar për sulme me dronë në qytetin Jammu, në zonën e Kashmirit që kontrollohet nga India, pak orë pas arritje së armëpushimit në mes Indisë dhe Pakistanit të ndërmjetësuar nga Shtetet e Bashkuara të Amerikës.
Edhe ekipet e BBC-së kanë njoftuar se shpërthime po dëgjohen në Srinagar të Kashmirit të administruar nga India.
E nga Pakistani, ministri i Edukimit në Kashmirin e kontrolluar nga Pakistani ka raportuar se janë duke vazhduar përplasjet përgjatë kufirit de-facto me Indinë, ka raportuar “The Guardian”.
India dhe Pakistani, të shtunën kanë arritur një armëpushim të menjëhershëm dhe të plotë për konfliktin që u përshkallëzua gjatë javëve të fundit në territorin e kontestuar të Kashmirit, me ndërmjetësimin e presidentit amerikan, Donald Trump.
Tensionet në mes vendeve u përshkallëzuan pasi një grup terrorist pati kryer një sulm terrorist në Kashmirin e kontrolluar nga India duke vrarë 26 persona. E India e ka akuzuar Pakistanin për përfshirje, akuza që Islamabadi zyrtar i ka mohuar.
