-
Përktheu:
Flutura Gashi-Mehmeti
- 10 nëntor 2025 10:38
- Shpërndaje në:
Takimi i presidentit sirian, Ahmad al-Sharaa me presidentin e SHBA-së Donald Trump në Shtëpinë e Bardhë të hënën shënon një vit mahnitës për rebelin e shndërruar në udhëheqës, i cili rrëzoi një sundimtar autokratik prej kohësh dhe që atëherë ka udhëtuar nëpër botë, ndërsa kërkon t'i japë fund izolimit ndërkombëtar të Sirisë.
Trumpi do të mirëpresë Sharaan në vizitën e parë të një presidenti sirian në Shtëpinë e Bardhë, gjashtë muaj pasi dyshja u takuan për herë të parë në Arabinë Saudite dhe vetëm disa ditë pasi Uashingtoni tha se ish-anëtari i al-Kaedës nuk ishte më një “terrorist global”.
Sharaa, 42 vjeç, mori pushtetin vitin e kaluar pasi luftëtarët e tij islamistë nisën një ofensivë të rrufeshme nga enklava e tyre në veriperëndim të Sirisë dhe rrëzuan presidentin sirian prej kohësh, Bashar al-Assad vetëm disa ditë më vonë, më 8 dhjetor.
Riorganizimi rajonal i Sirisë që atëherë ka lëvizur me një ritëm marramendës, larg aleatëve kryesorë të Assadit, Iranit dhe Rusisë, dhe drejt Turqisë, Gjirit dhe Uashingtonit.
Siguria ka të ngjarë të jetë një fokus kryesor i takimit të hënën. SHBA-ja po ndërmjetëson bisedimet midis Sirisë dhe Izraelit mbi një pakt të mundshëm sigurie, dhe Reuters ka raportuar ditë më parë se SHBA-ja po planifikon të krijojnë një prani ushtarake në një bazë ajrore në Damask.
Siria është gjithashtu gati t'i bashkohet një koalicioni të udhëhequr nga SHBA-ja për të luftuar Shtetin Islamik, gjë që mund të njoftohet zyrtarisht në takimin e së hënës në Shtëpinë e Bardhë.
Disa ditë para takimit, Trump u ka thënë gazetarëve në Shtëpinë e Bardhë se "është bërë shumë përparim" në Siri.
"Mendoj se ai (Sharaa) po bën një punë shumë të mirë. Është një vend i vështirë dhe ai është një djalë i ashpër, por unë u kuptova shumë mirë me të", ka thënë Trump.
Pasi Sharaa dhe Trump u takuan në Riad në maj, Trump njoftoi se do të hiqte të gjitha sanksionet ndaj Sirisë.
Por masat më të ashpra, të njohura si Akti i Sanksioneve të Cezarit, kërkojnë një shfuqizim nga Kongresi.
Shtëpia e Bardhë dhe Departamenti i Shtetit kanë mbështetur publikisht heqjen e tyre para se të përfundojë viti 2025, por ekspertët thonë se mbyllja e qeverisë mund të ndikojë në atë afat kohor.
Sharaa pritet të mbështesë fuqimisht shfuqizimin, i cili do të ndihmojë në nxitjen e investimeve globale në një vend të shkatërruar nga 14 vjet luftë dhe për të cilin Banka Botërore vlerëson se do të duhen më shumë se 200 miliardë dollarë për t'u rindërtuar.
Kthesa e Sharaas nuk është më pak mbresëlënëse se ajo e vendit të tij. Ai i ishte bashkuar al-Kaedës në Irak gjatë kohës së pushtimit të udhëhequr nga SHBA-ja në vitin 2003 dhe ka kaluar vite në burgun amerikan atje, përpara se të kthehej në Siri për t'u bashkuar me kryengritjen kundër Assadit.
Në vitin 2013, SHBA-ja e ka shpallur Sharaan, të njohur atëherë si Abu Mohammad al-Golani, terrorist për lidhjet e tij me al-Kaedën. Ai i ndërpreu lidhjet me grupin në vitin 2016 dhe konsolidoi ndikimin e tij në veriperëndim të Sirisë.
SHBA-ja hoqi më pas një shpërblim prej 10 milionë dollarësh për kokën e Sharaas në dhjetor, dhe vetëm javën e kaluar, Këshilli i Sigurimit i Kombeve të Bashkuara hoqi sanksionet e lidhura me terrorizmin ndaj tij dhe ministrit të tij të Brendshëm, Anas Khattab.
Pas lëvizjes së OKB-së, Britania dhe SHBA-ja hoqën sanksionet ndaj dyshes.