Të paktën 12 të vdekur pas sulmeve izraelite në Liban, përshkallëzojnë tensionet në rajon

Të paktën 10 persona u vranë dhe 24 u plagosën në mesin e tyre tre fëmijë nga sulmet izraelite në Luginën Bekaa të Libanit të premten, njoftoi Ministria e Shëndetësisë libaneze.

Dy persona të tjerë u vranë nga një sulm izraelit më herët gjatë së premtes në një kamp refugjatësh palestinezë në qytetin e Sidonit, raportoi AP. 

Zyrtarët izraelitë thanë se kishin goditur "qendrat e komandës" të grupit militant libanez Hezbollah në Luginën Bekaa.

Pamjet televizive nga vendi i ngjarjes së njërit prej sulmeve treguan se vendi i synuar dukej të ishte një ndërtesë apartamentesh.

Ushtria izraelite tha se goditi një "qendër komande të Hamasit" në kampin Ein el-Hilweh.

Hamasi pranoi se dy nga anëtarët e tij ishin vrarë në sulm, por e quajti pretendimin se një qendër komande u godit një "pretekst të dobët".  Tha se ndërtesa e synuar i përkiste një force të përbashkët sigurie të përbërë nga fraksione të ndryshme palestineze e ngarkuar me ruajtjen e sigurisë në kamp.

Pas sulmit të udhëhequr nga Hamasi ndaj Izraelit më 7 tetor 2023 që shkaktoi luftë në Gazë, Hezbollahu filloi të gjuante raketa nga Libani në Izrael në mbështetje të Hamasit dhe palestinezëve.
Izraeli u përgjigj me sulme ajrore dhe granatime. Konflikti i nivelit të ulët u përshkallëzua në një luftë të plotë në shtator 2024, e cila më vonë u frenua, por nuk u ndal plotësisht nga një armëpushim i ndërmjetësuar nga SHBA-ja dy muaj më vonë.

Që atëherë, Izraeli e ka akuzuar Hezbollahun se po përpiqet të rigrupohet duke kryer sulme pothuajse të përditshme në Liban, të cilat thotë se synojnë militantët dhe objektet e Hezbollahut.

Sulmet e së premtes vijnë në një moment tensionesh të intensifikuara në rajon, pasi Shtetet e Bashkuara kanë kërcënuar të godasin Iranin, një mbështetës si të Hezbollahut ashtu edhe të Hamasit, nëse negociatat mbi programin bërthamor të Teheranit dështojnë të prodhojnë një marrëveshje.