-
Përktheu:
Flutura Gashi-Mehmeti
- 27 janar 2026 20:02
- Shpërndaje në:
Qeveria spanjolle ka njoftuar një plan për të legalizuar statusin e emigrantëve pa dokumente, një masë nga e cila pritet të përfitojnë të paktën gjysmë milioni persona.
Rregullimi i statusit do të jetë i mundshëm për shtetas të huaj që nuk kanë precedentë penalë dhe që mund të dëshmojnë se kanë jetuar në Spanjë për të paktën pesë muaj para 31 dhjetorit 2025.
“Kjo është një ditë historike për vendin tonë”, ka thënë Elma Saiz, ministre e përfshirjes, sigurimeve shoqërore dhe migracionit në Spanjë.
Masa do t’u sigurojë përfituesve një leje qëndrimi fillestare njëvjeçare, e cila më pas mund të zgjatet.
Kërkesat për legalizim pritet të nisin në prill dhe procesi do të mbetet i hapur deri në fund të qershorit.
“Po forcojmë një model migracioni të bazuar në të drejtat e njeriut, integrimin, bashkëjetesën dhe që është i përputhshëm me rritjen ekonomike dhe kohezionin shoqëror”, ka shtuar Saiz.
Spanja ka përjetuar një fluks të madh emigrantësh vitet e fundit, kryesisht nga Amerika Latine.
Instituti kërkimor konservator Funcas ka zbuluar se numri i emigrantëve pa dokumente në Spanjë është rritur nga 107.409 në vitin 2017 në 837.938 në vitin 2025, duke shënuar një rritje tetëfishore.
Numri më i madh i emigrantëve pa dokumente që aktualisht jetojnë në Spanjë besohet se vijnë nga Kolumbia, Peruja dhe Hondurasi.
Qeveria e koalicionit e udhëhequr nga socialistët në Spanjë ka qenë një përjashtim në këtë çështje mes vendeve më të mëdha evropiane, duke theksuar rëndësinë e emigrantëve për ekonominë.
Vendi ka pasur performancë më të mirë se ekonomitë e tjera kryesore të BE-së vitet e fundit, duke shënuar një rritje të pritshme prej afërsisht 3% në vitin 2025.
Papunësia, një dobësi e kahershme e ekonomisë spanjolle, ka rënë nën 10% për herë të parë që nga viti 2008, sipas shifrave të publikuara të martën.