Shtetet e Bashkuara të Amerikës e kanë etiketuar zyrtarisht Kolumbinë si vend që “ka dështuar në mënyrë të dukshme” t’i përmbushë detyrimet për ta kontrolluar trafikun e drogës, raporton “BBC”.
Por, SHBA-ja nuk ka marrë ende vendim që ta ndërpresë fluksin e ndihmave amerikane për Kolumbinë.
Çdo vit Qeveria e SHBA-së e bën një listë të vendeve që s’bashkëpunojnë plotësisht në përpjekjet për luftimin e narkotikëve. Dhe ato që cilësohen si jobashkëpunuese rrezikojnë t’u ndërpriten fondet amerikane.
Të hënën, administrata Trump tha se prodhimi i kokainës në Kolumbi ishte rritur në shifra rekorde nën presidentin e saj të krahut të majtë, Gustavo Petro, gjë që udhëheqësi kolumbian e mohoi.
Në përgjigje, Qeveria kolumbiane tha se do të ndalonte blerjen e armëve nga SHBA-ja.
Ministri i Brendshëm i Kolumbisë, Armando Benedetti, konfirmoi ndalimin e blerjes së armëve amerikane.
Vendet tjera që SHBA-ja ka thënë se s’kanë arritur t’i përmbushin objektivat në luftimin e drogës janë Afganistani, Bolivia, Birmania dhe Venezuela.
Kolumbia është shtuar në listë për herë të parë që nga viti 1997.