Zëvendësministri rus i Mbrojtjes, Timur Ivanov, është arrestuar të martën nën dyshimin për marrje ryshfeti, ka njoftuar Komiteti Hetues i Rusisë, raportoi “The Moscow Times”.
Në deklaratën e lëshuar nga ky komitet nuk janë dhënë shumë detaje.
“Zëvendësministri i Mbrojtjes i Federatës Ruse, Timur Vadimovich Ivanov është arrestuar nën dyshimin për kryerjen e një krimi sipas pjesës 6 të nenit 290 të Kodit Penal (marrje e ryshfetit)”, thuhet në njoftim.
Siç është raportuar, vepra dënohet me gjobë të madhe ose me mbi 10 vjet burg, në varësi të detajeve të krimit.
Ivanovi është nën sanksionet e Bashkimit Evropian si zyrtar i lartë i Ministrisë ruse të Mbrojtjes.
Ai gjithashtu ishte objekt hetimi i liderit të ndjerë të opozitës ruse, Alexei Navalny. Në raportin e publikuar në vitin 2022 nga Fondacioni Anti-Korrupsion i Navalnyt thuhej se Ivanovi mbikëqyrte dhe përfitoi nga projektet e ndërtimit në Mariupol të Ukrainës, vend ky që ra nën kontrollin e Moskës pas një rrethimi prej disa muajsh.
Në këtë raport tutje thuhej se zëvendësministri është divorcuar nga gruaja e tij për ta lejuar atë të anashkalohej nga sanksionet e BE-së.