-
Përktheu:
Flutura Gashi-Mehmeti
- 4 gusht 2025 12:16
- Shpërndaje në:
Një grup prej rreth 600 zyrtarësh të pensionuar të sigurisë izraelite, përfshirë ish-krerë të agjencive të inteligjencës, i kanë shkruar presidentit të SHBA-së, Donald Trump për të ushtruar presion mbi Izraelin që të përfundojë menjëherë luftën në Gazë.
"Është gjykimi ynë profesional se Hamasi nuk përbën më një kërcënim strategjik për Izraelin", kanë thënë zyrtarët.
"Besueshmëria juaj te shumica dërrmuese e izraelitëve rrit aftësinë tuaj për të drejtuar kryeministrin Netanyahu dhe qeverinë e tij në drejtimin e duhur: Përfundoni luftën, ktheni pengjet, ndaloni vuajtjet", kanë shkruar ata.
Apeli i tyre vjen mes raporteve se Netanyahu po shtyn përpara zgjerimin e operacioneve ushtarake në Gaza, ndërsa bisedimet indirekte për armëpushim me Hamasin kanë ngecur.
Izraeli ka nisur luftën shkatërruese në Gaza pas sulmit të Hamasit në Izraelin jugor më 7 tetor 2023, në të cilin u vranë rreth 1,200 njerëz dhe 251 u morën peng.
Më shumë se 60,000 njerëz janë vrarë si rezultat i fushatës ushtarake të Izraelit në Gaza që atëherë, sipas ministrisë së shëndetësisë të drejtuar nga Hamasi.
"Ndalojeni Luftën në Gaza! Në emër të CIS, grupit më të madh të ish-gjeneralëve të IDF-së në Izrael dhe ekuivalentëve të Mossad, Shin Bet, Policisë dhe Trupit Diplomatik, ju bëjmë thirrje që t'i jepni fund luftës në Gaza. Ju e bëtë në Liban. Është koha ta bëni edhe në Gaza", i kanë shkruar ata presidentit të SHBA-së.