-
Përktheu:
Flutura Gashi-Mehmeti
- 17 nëntor 2025 11:17
- Shpërndaje në:
Një vizitë e sundimtarit de facto të Arabisë Saudite në Shtëpinë e Bardhë për bisedime të martën me presidentin e SHBA-së Donald Trump synon të thellojë bashkëpunimin dekadash mbi naftën dhe sigurinë, duke zgjeruar lidhjet në tregti, teknologji dhe potencialisht edhe në energjinë bërthamore.
Ky do të jetë udhëtimi i parë i Princit të Kurorës Mohammed bin Salman në SHBA që nga vrasja e kritikut saudit Jamal Khashoggi në vitin 2018 nga agjentët sauditë në Stamboll, e cila shkaktoi një trazirë globale.
Inteligjenca amerikane arriti në përfundimin se MBS-ja miratoi kapjen ose vrasjen e Khashoggi, një kritik i shquar.
Princi i kurorës, i njohur gjerësisht me inicialet e tij MBS, mohoi se kishte urdhëruar operacionin, por pranoi përgjegjësinë si sundimtar de facto i mbretërisë.
Më shumë se shtatë vjet më vonë, ekonomia më e madhe në botë dhe prodhuesi më i madh i naftës në botë duan të ecin përpara.
Trumpi synon të përfitojë nga një premtim saudit investimi prej 600 miliardë dollarësh i bërë gjatë vizitës së Trumpit në mbretëri në maj. Ai shmangu përmendjen e shqetësimeve për të drejtat e njeriut gjatë atij udhëtimi dhe pritet ta bëjë këtë përsëri.
Udhëheqësi saudit po kërkon garanci sigurie mes trazirave rajonale dhe dëshiron qasje në teknologjinë e inteligjencës artificiale dhe përparim drejt një marrëveshjeje mbi një program bërthamor civil.
Shtetet e Bashkuara dhe Arabia Saudite kanë pasur prej kohësh një marrëveshje që mbretëria të shesë naftë me çmime të favorshme dhe që superfuqia të ofrojë siguri në këmbim.
Ky “ekuacion” u trondit nga dështimi i Uashingtonit për të vepruar kur Irani goditi instalimet e naftës në mbretëri në vitin 2019. Shqetësimet u rishfaqën në shtator, kur Izraeli goditi Dohën, Katar, në një sulm për të cilin tha se kishte në shënjestër anëtarët e grupit militant palestinez Hamas.
Pas kësaj, Trumpi nënshkroi një pakt mbrojtjeje me Katarin nëpërmjet një urdhri ekzekutiv. Shumë analistë, diplomatë dhe zyrtarë rajonalë besojnë se sauditët do të marrin diçka të ngjashme.