Pentagoni refuzon të konfirmojë angazhimin e SHBA-së ndaj mbrojtjes kolektive të NATO-s

Sekretari i Mbrojtjes, Pete Hegseth, ka refuzuar të martën të rikonfirmojë angazhimin e Shteteve të Bashkuara ndaj mbrojtjes kolektive të NATO-s, duke thënë se kjo do të varet nga presidenti Donald Trump, pasi aleatët evropianë nuk kishin qëndruar përkrah SHBA-së në luftën kundër Iranit.

Deklaratat e Hegseth gjatë një konference për shtyp në Pentagon ishin të jashtëzakonshme, duke pasur parasysh se mbrojtja kolektive është në thelb të aleancës së NATO-s, e cila u formua në vitin 1949 me qëllimin kryesor për të kundërshtuar rrezikun e një sulmi sovjetik ndaj territorit të aleatëve.

Çdo sinjal nga Shtetet e Bashkuara se mund të mos jenë të gatshme të mbrojnë aleatët e NATO-s në rast të një sulmi nga Rusia ose një kundërshtari tjetër, mund ta dobësojë ndjeshëm aleancën, edhe nëse Trumpi vendos të mos tërhiqet plotësisht prej saj, një veprim që mund të kërkojë miratimin e Kongresit.

Ekspertët kanë paralajmëruar prej kohësh se deklarata të tilla mund të inkurajojnë gjithashtu Rusinë të testojë gatishmërinë e vendeve anëtare të NATO-s për të zbatuar Nenin 5 të aleancës, i cili thotë se një sulm i armatosur kundër një shteti anëtar konsiderohet si sulm kundër të gjithëve.

“Sa i përket NATO-s, kjo është një vendimmarrje që do t’i lihet presidentit. Por mund të them se shumë gjëra janë bërë të qarta”, ka thënë Hegseth i pyetur nga Reuters gjatë një konference për shtyp nëse Shtetet e Bashkuara janë ende të përkushtuara ndaj mbrojtjes kolektive të NATO-s. 

Hegseth më pas duket se iu referua komenteve të fundit të Trumpit në rrjetet sociale, ku ai kritikoi Francën për moslejimin e fluturimit mbi territorin e saj të avionëve ushtarakë amerikanë që transportonin furnizime drejt Izraelit dhe gjithashtu kritikoi Britaninë për mosnisjen e luftës kundër Iranit së bashku me SHBA-në dhe Izraelin.

Trumpi ka deklaruar të premten se Shtetet e Bashkuara “nuk kanë pse të jenë aty për NATO-n”.