Pentagoni është gati të dërgojë 1 miliard dollarë ndihmë të re ushtarake për Ukrainën, thanë zyrtarët amerikanë të martën, ndërsa Senati filloi debatin mbi legjislacionin e shumëpritur për financimin e armëve që Kievit i duhen për të penguar përparimet që po bëhen nga forcat ruse në luftë.
Vendimi vjen pas muajsh zhgënjimi, pasi anëtarët e përçarë të Kongresit bllokuan financimin, duke detyruar kryetarin e Dhomës së Përfaqësuesve, Mike Johnson, të bashkojë një koalicion dypartiak për të miratuar projektligjin. Paketa e ndihmës së huaj prej 95 miliardë dollarësh, që përfshinë miliarda edhe për Izraelin dhe Tajvanin, kaloi në Dhomën e Përfaqësuesve të shtunën dhe miratimi i Senatit pritet të martën, raporton AP.
Votat janë rezultat i një debati të tensionuar disa javor, duke përfshirë kërcënimet nga fraksioni i djathtë i Johnsonit për ta rrëzuar atë nga posti i kryetarit. Rreth 61 miliardë dollarë të ndihmës janë për Ukrainën.
Paketa përfshin një sërë municionesh, duke përfshirë municionet e mbrojtjes ajrore dhe sasi të mëdha raundesh artilerie që janë shumë të kërkuara nga forcat ukrainase, si dhe automjete të blinduara dhe armë të tjera. Zyrtarët amerikanë thanë se disa nga armët do të dorëzohen shumë shpejt në frontin e betejës, disa brenda disa ditësh - por mund të duhet më shumë kohë që të mbërrijnë sendet e tjera. Ata folën në kushte anonimiteti sepse ndihma nuk ishte shpallur ende publikisht.
Infuzion i armëve të Amerikës vjen pas një njoftimi nga Britania e Madhe të martën, duke premtuar një shtesë prej 620 milionë dollarësh në furnizime të reja ushtarake për Ukrainën, duke përfshirë raketa me rreze të gjatë dhe 4 milionë fishekë municionesh.
