-
Përktheu:
Flutura Gashi-Mehmeti
- 25 mars 2026 08:36
- Shpërndaje në:
E udhëhequr nga kryeministrja, Mette Frederiksen, Social Demokratët e Danimarkës kanë fituar më së shumti vota në zgjedhjet parlamentare të vendit, por nuk kanë arritur të sigurojnë shumicën, pas rezultatit më të dobët të partisë në më shumë se një shekull.
Duke marrë 21.9% të votave, Social Demokratët, të cilët kanë qeverisur që nga viti 2019, kanë dalë të parët në zgjedhjet e përgjithshme të së martës.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoMe 38 vende në parlament, partia mbetet larg më e madhja, por kjo nuk mjafton për të shpallur fitoren e vetme.
Brenda parlamentit të Danimarkës, Christiansborg, mbështetësit e Social Demokratëve brohoritën dhe duartrokitën Frederiksen, ndërsa ajo i tha turmës: “Më vjen keq që nuk morëm më shumë vota. Edhe unë shpresoja për një rezultat më të mirë”.
“Por sot nuk ka asgjë që mund të më bëjë të trishtuar që Social Demokratët janë bërë edhe një herë partia politike absolute e preferuar e danezëve”, ka shtuar ajo.
Frederiksen ende ka një shans të qëndrojë në pushtet për një mandat të tretë, megjithatë Danimarka zakonisht qeveriset nga qeveri koalicioni, dhe kështu tani priten negociata të vështira, të cilat mund të zgjasin me ditë apo javë.
Duke siguruar gjithsej 84 vende, “blloku i kuq” i partive të majta ka marrë një epërsi të vogël ndaj “bllokut blu” i atyre të djathta, të cilët kanë së bashku 77 vende.
Të dy blloqet kanë mbetur nën 90 vendet që nevojiten për shumicë në parlamentin prej 179 vendesh të Danimarkës.
Ende nuk është e qartë se cili bllok do të mund të formojë shumicën.
Megjithatë, “Të moderuarit”, një parti e vogël që mban 14 vende, tani ka fuqinë të luajnë rolin vendimtar, dhe të gjithë sytë janë te lideri i saj, ish-kryeministri Lars Løkke Rasmussen.
Zgjedhjet e parakohshme në Danimarkë janë zhvilluar mes tensioneve të këtij shteti me SHBA-në për shkak të pretendimit të presidentit Donald Trump për ta marrë kontrollin e ishullit autonom të saj, Grenlandës.
Jep dorëheqjen kryeministrja e Danimarkës, Mette Frederiksen
Photo: Associated Press
Kryeministrja e Danimarkës, Mette Frederiksen, ka dhënë dorëheqjen nga posti, gjatë takimit të saj me Mbretin Frederik, ka bërë të ditur të mërkurën Pallati Mbretëror danez.
Vendimi bjen pas rezultateve të zgjedhjeve të parakohshme të së martës, në të cilat ajo ka kryesuar me vota, por nuk ka arritur shumicën e nevojshme për formimin e qeverisë.
Vendimi i saj për dorëheqje vë në lëvizje procesin e formimit të qeverisë së re, veçanërisht pasi qeveria trepartiake në largim nuk ka shumicën e nevojshme për të vazhduar në detyrë. Ajo ka arritur të fitojë 70 vende, shumë më pak se 90 të kërkuara për një shumicë.
Por Frederiksen pritet të mbetet në post si kryeministre në detyre derisa të formohet një administratë e re, teksa ende mbetet një nga favoritet për të rikthyer postin që mbante.
Një takim i partive politike, në të cilin ato do të shqyrtojnë një rrugë të mundshme përpara, për të punuar në formimin e shumicës së re, është thirrur për në orën 13:00 sipas kohës lokale.